Šmatlikija parušeńni zakanadaŭstva ab abaronie pravoŭ spažyŭcoŭ vyjaŭlenyja ŭ handlovych centrach Minska, paviedamiŭ pres-sakratar Ministerstva handlu Biełarusi Dźmitryj Malinoŭski.
«Padčas kantrolnych mierapryjemstvaŭ, praviedzienych Minhandlem, słužbami Dziaržstandartu i Ministerstva achovy zdaroŭja ŭ červieni 2014 hoda, u staličnych handlovych centrach «Zierkało», «Passaž», «Siłuet», «Jevropa» vyjaŭlenyja šmatlikija parušeńni pry realizacyi tavaraŭ lohkaj pramysłovaści», — skazaŭ pres-sakratar.
Pa słovach pradstaŭnika Minhandlu, u abjektach było adabrana bolš za 100 najmieńniaŭ pradukcyi impartnaj vytvorčaści, u tym liku cacki, dziciačy abutak, trykatažnyja i šviejnyja vyraby.
Papiarednija vyniki pravierak śviedčać ab najaŭnaści ŭ handlovych centrach parušeńniaŭ pa biaśpiecy i jakaści: nieadpaviednaść abutku techničnym patrabavańniam, dezinfarmacyja pakupnikoŭ nakont daty vyrabu i materyjału (na cetliku ŭkazanaja naturalnaja skura, a faktyčna — štučnaja), adsutnaść papieradžalnych nadpisaŭ na dziciačych cackach.
«U niekatorych vypadkach dla vyjaŭleńnia defiektaŭ, jakija niasuć patencyjnuju pahrozu zdaroŭju spažyŭca, navat nie patrabavałasia śpiecyjalnych viedaŭ — dastatkova było vizualnaha ahladu vyraba», — adznačyŭ Dźmitryj Malinoŭski.
Pa vynikach abśledavańniaŭ užo vydadziena bolš za 30 rekamiendacyj na likvidacyju parušeńniaŭ zakanadaŭstva ab abaronie pravoŭ spažyŭcoŭ.