Deputaty pałaty pradstaŭnikoŭ na pasiadžeńni 26 červienia pryniali ŭ pieršym čytańni papraŭki ŭ niekatoryja kodeksy, jakija tyčacca ŭzmacnieńnia mier adkaznaści za pravaparušeńni ŭ śfiery palaŭnictva i rybałoŭstva.
Zakonaprajekt praduhledžvaje źmieny i dapaŭnieńni ŭ Kryminalny kodeks, Kodeks ab administracyjnych pravaparušeńniach i ŭ Pracesualna-vykanaŭčy kodeks ab administracyjnych pravaparušeńniach. U pryvatnaści, zdabyča ryby abo inšych vodnych žyvioł biez naležnaha dazvołu, u zabaronienych miesca, u zabaronieny čas, zabaronienaj zbrojaj, učynienaje na praciahu hoda paśla nakładańnia administracyjnaha spahnańnia za takoje ž parušeńnie, budzie karacca štrafam, abo papraŭčymi rabotami na termin da dvuch hadoŭ, abo aryštam.
Papraŭki ŭ Kryminalny kodeks praduhledžvajuć adkaznaść za niezakonnaje pieramiaščeńnie i raźbirańnie palaŭničych žyvioł: učynienych na praciahu hoda paśla nakładańnia administracyjnaha spahnańnia; u bujnym pamiery abo na terytoryi zapaviednika, nacyjanalnaha parku abo zakaźnika; učynienych słužbovaj asobaj z vykarystańniem svaich słužbovych paŭnamoctvaŭ. U Kodeksie ab administracyjnych pravaparušeńniach płanujecca praduhledzieć, što dapamahaty budzie nieści administracyjnuju adkaznaść za saŭdzieł u administracyjnym pravaparušeńni.
U artykule KoAP ab kanfiskacyi płanujecca praduhledzieć, što śpiecyjalnaja kanfiskacyja niezakonnych pryład palavańnia i zdabyčy ryb i žyvioł u prymusovym biazvypłatnym paradku budzie prymianiacca niezaležna ad pryznačanaha administracyjnaha spahnańnia abo vyzvaleńnia asoby ad administracyjnaj adkaznaści.
Akramia taho, uzmacniajecca administracyjnaja adkaznaść za parušeńnie praviłaŭ viadzieńnia rybałoŭnaj haspadarki, zdabyčy ryby abo inšych vodnych žyvioł, a taksama za parušeńnie praviłaŭ viadzieńnia palaŭničaj haspadarki i palavańnia.
Jak paviedamiŭ načalnik Dziaržaŭnaj inśpiekcyi achovy žyviolnaha i raślinnaha śvietu pry prezidencie Siarhiej Novikaŭ, za 2013 hod było vyjaŭlena amal 6 tysiač pravaparušeńniaŭ u śfiery palavańnia i rybałoŭstva, za pieršy kvartał 2014 hoda — kala 1,5 tysiačy. Da administracyjnaj adkaznaści letaś było pryciahnuta 4,7 tysiačy čałaviek i 225 da kryminalnaj, za pieršy kvartał hetaha hoda — 1,5 tysiačy i 50 čałaviek adpaviedna.
