Voś i prajšło ŭ čarhovy raz centralizavanaje testavańnie. Adny ŭžo viedajuć, kudy pojduć, inšyja vahajucca. Ale jość i trecija — tyja, chto nabraŭ minimum bałaŭ, ale ŭsio adno čakajuć zaličeńnia ŭ VNU. Pry paŭtornym nabory abituryjentaŭ parohavyja značeńni CT buduć źnižany. Letaś byli niedabory na šerah śpiecyjalnaściaŭ, možna toje čakać i ciapier.
I vychodzić, što abituryjentu dastatkova zdać biełaruskuju /rasiejskuju movu na 10 bałaŭ, matematyku — na 15, historyju Biełarusi — na 20, kab pastupić va ŭniviersitet, chaj i nie na prestežnyja śpiecyjalnaści. A pry niezaniataści miescaŭ chopić 5, 10, 15 adpaviedna. A što takoje 5, 10 i 15? Dy heta amal ništo — sprava vypadku.
Syn znajomych rychtujecca pastupać u Vajskovuju akademiju. Jon skončyŭ škołu dva hady tamu. Letaś nie chapiła adnaho bała, kab pieraadoleć minimalny paroh pa historyi Biełarusi. I zabrali ŭ armiju. Sioleta ŭžo nie chapiła adnaho bała pa matematycy. Jon zdaŭ biełaruskuju movu na 13, matematyku na 14, historyju Biełarusi na 24 bały. «Prachodzić, — z upeŭnienaściu zajaviła jaho maci. — Na abranuju im śpiecyjalnaść letaś byŭ niedabor». A jaho siabar, jaki taksama pastupaje ŭ Vajskovuju akademiju, nie dabraŭ bałaŭ pa movie — zdaŭ tolki na 6 (!). I jon taksama ŭpeŭnieny, što projdzie. A kali sapraŭdy abodvuch zaličać, chiba ich ź ich mohuć vyraści hramatnyja, sučasnyja aficery? Nie.
A armija ž u nas — krynica kadraŭ dla dziaržaparata. Jakaja ž tady heta elita, kali heta panyłyja dvoječniki.
