ZŠA razhladajuć mahčymaść pierachodu da ekanamičnych sankcyj suprać Rasiei. Pra heta zajaviła ŭ aŭtorak na rehularnym bryfinhu dla žurnalistaŭ načalnica pres-słužby Dziarždepartamienta ZŠA Džen Psaki.
Pavodle jaje słoŭ, amierykanski ŭrad «razhladaje dadatkovyja sankcyi ŭ skaardynavanaj maniery ź jeŭrapiejcami». Psaki paćvierdziła, što «siektaralnyja sankcyi zastajucca adnym z mahčymych varyjantaŭ dziejańniaŭ» Amieryki.
Ministr zamiežnych spraŭ Rasii Siarhiej Łaŭroŭ pozna ŭviečary ŭ aŭtorak zajaviŭ: «Sumna, što prezident vialikaj dziaržavy padychodzić da suśvietnych spravach z takoha rodu pazicyjaj». «Napeŭna, treba stavicca da ŭsiaho pa-fiłasofsku, ale my supraćpastaŭlajem adnabakovym dziejańniam rozum i prahmatyzm», — skazaŭ Łaŭroŭ.
Na minułym tydni bajeviki Danbasa masava ŭžyvali rakietnyja ŭstanoŭki rasijskaj vytvorčaści «Hrad» i, mahčyma, «Urahan».
U pres-słužbie Rady nacyjanalnaj biaśpieki (RNB) ZŠA ŭ adkaz na prośbu karespandenta rasijskaha ahienctva ITAR-TASS prakamientavać infarmacyju pra kansultacyi Vašynhtona ź jeŭrapiejskimi sajuźnikami u pytańni ab sankcyjach suprać Rasiei z-za padziej na Ukrainie zajavili, što sankcyi suprać Rasii nie samameta dla Złučanych Štataŭ.
«Jany vykarystoŭvajucca tamu, što nichto nie choča bačyć Ukrainu pravalnaj, a sankcyi — pakul hałoŭnaje, što strymlivaje Rasiju ad dalejšaj ahresii. Tak što pakul Rasija nie prymie zachadaŭ, jakich patrabujem my i našy partniory, my budziem i nadalej razam z našymi jeŭrapiejskimi partniorami praciahvać padrychtoŭku da ŭviadzieńnia sankcyj», — padkreślili ŭ pres-słužbie RNB.
Raniej ahienctva Bloomberg sa spasyłkaj na infarmavanyja krynicy paviedamiła, što ŭ paniadziełak, 15 lipienia, u Biełym domie adbyłasia zakrytaja sustreča pradstaŭnikoŭ administracyi ZŠA z pasłami šerahu jeŭrapiejskich krain. Na hetaj sustrečy, paviedamili ahienctvu ŭdzielniki pieramovaŭ, amierykanski bok prasiŭ dypłamataŭ ź ES zhody na ŭzmacnieńnie žorstkaści sankcyj suprać Rasiei.
U advarotnym vypadku, śćviardžali krynicy Bloomberg, ZŠA nibyta hatovyja zrabić bolš žorstkimi sankcyi ŭ dačynieńni da RF u adnabakovym paradku. Pa słovach surazmoŭcaŭ ahienctva, na takoje adnabakovaje ŭzmacnieńnie žorstkaści sankcyj u dačynieńni da Maskvy Złučanyja Štaty mohuć pajści ŭ bližejšyja dni.
