YouTube zabłakavaŭ dostup da filma «Łabatamija».
Stužka pra rasiejska-hruzinskuju vajnu była vydalenaja ź videachostynhu na patrabavańni prakramloŭskaha palitołaha Siarhieja Kurhiniana. Pra heta sajtu charter97.org raspavioŭ režysior Jury Chaščavacki.
- Ja pieryjadyčna prahladaju samuju papularnuju staronku ź filmam na YouTube. Mnie była cikavaja dynamika prahladaŭ. Kali pačalisia padziei va Ukrainie, jana vielmi mocna źmianiłasia. Film hladzieli niekalki tysiač čałaviek u dzień. Usiaho było bolš za 400 tysiač prahladaŭ. Ja sačyŭ za statystykaj, abmierkavańniem - heta vielmi cikava dla mianie.
U adzin dzień - heta było dasłoŭna na nastupnyja dzień paśla taho, jak źbili małajzijski «Boinh» - ja zajšoŭ na staronku i ŭbačyŭ nastupnaje papiaredžańnie: «U suviazi z parušeńniem aŭtarskich pravoŭ videa zabłakavanaje». U mianie vočy na łob vyleźli, tamu što ŭsie aŭtarskija pravy naležać mnie. Ja chucieńka napisaŭ list na YouTube z dvuma prośbami. Pieršaja - viarnuć u svabodny dostup film. Niahledziačy na toje, što vykłaŭ jaho niejki inšy čałaviek, ja nie mieŭ ničoha suprać hetaha i z zadavalnieńniem naziraŭ za jaho abmierkavańniem. Druhaja - paviedamić ab tym, chto pačaŭ «abaraniać» maje aŭtarski pravy. U piatnicu jany paviedamili, što zabłakavać film paprasiła studyja «Sutnaść času» Siarhieja Kurhiniana, - skazaŭ Juryj Chaščavacki.
- Ci adnavili vaš film na YouTube paśla lista?
- Film dastupny na mnohich staronkach, adnak na samaj papularnaj ź ich jaho pahladzieć pakul nielha. Ciapier my viadziem pieramovy ab tym, kab film byŭ adnoŭleny i na im. Ja taksama ŭ jakaści zvarotnaha chodu paprasiŭ znajomych zapampavać «Łabatamiju» z subtytrami na anhielskaj movie - pra heta mnohija prasili.
- Niekalki dzion nazad stała viadoma, što ŭsio toj ža Siarhiej Kurhinian zapatrabavaŭ vydalić jašče adzin rolikpad nazvaj «Pucin - padpalščyk vajny». Matyvacyja taja ž - parušeńnie aŭtarskich pravoŭ. Heta supadzieńnie?
- Ja taksama źviarnuŭ na heta ŭvahu. Da taho momantu ja ŭžo vioŭ pieramovy z YouTube. U mianie tady ŭźnikła padazreńnie, što mienavita Siarhiej Kurhinian datyčny i da vydaleńnia «Łabatamii». Na nastupny dzień jano paćvierdziłasia. Padobna da kampanii ačystki internetu ad niepažadanych videa. Reč u tym, što dla vydaleńnia rolika z YouTube dastatkova zajavy ab parušeńni aŭtarskich pravoŭ. Servis zychodzić z taho, što takija zajavy mohuć zychodzić tolki ad taho, chto sapraŭdy źjaŭlajecca aŭtaram. A pra toje, što takija praviły buduć vykarystoŭvacca dla infarmacyjnaj vajny jany nie dumali. U vyniku mnohija materyjały pačynajuć vydalacca z adkrytaha dostupu avanturystami typu Kurhiniana. Miarkujučy z usiaho, vielmi šmat videafajłaŭ zabłakavanyja takim čynam.
- 8 žniŭnia - hadavina napadu Rasiei na Hruziju. Vaš film byŭ źniaty paśla hetych padziej. Nakolki aktualny jon u suviazi z padziejami ŭ Danbasie?
- Na fonie kanfliktu va Ukrainie kolkaść prahladaŭ imkliva vyrasła. Raniej ja dumaŭ, što film zastaniecca aktualnym, ciapier ja ŭpeŭnieny ŭ hetym. Ludzi hladziać jaho im stanovicca zrazumieła vielmi mnohaje ŭ rasiejskaj palitycy. Ja nie źbiraŭsia zdymać film-adnadzionku pa «haračych śladach». Ab hetym možna daviedacca z navin. Ja sprabavaŭ zrazumieć unutranyja spružyny taho, što adbyvajecca ŭ Rasiei, adkul biarecca takaja ahresiŭnaść ŭ dačynieńni da susiednich krain. Materyjał tak skłaŭsia, što jon na 100 adsotkaŭ tłumačyć toje, što adbyvajecca va Ukrainie. Bajusia, što film zastaniecca aktualnym i dalej, tamu što samaja Rasieja nie spynicca na hetym, jaje treba spyniać. I čym chutčej ludzi heta zrazumiejuć, u tym liku, moža być, i paśla prahladu «Łabatamii», tym lepš.
