Hramadski aktyvist Kanstancin Žukoŭski praviadzie pa rašeńni suda Centralnaha rajona Homiela 5 sutak administracyjnaha aryštu ŭ IČU. Takoje rašeńnie vyniesła 28 žniŭnia sudździa Volha Kazłova, razhledzieŭšy administracyjny pratakoł, składzieny milicyjaj u dačynieńni da aktyvista.
Nahadajem, žychar Homiela byŭ zatrymany 25 žniŭnia supracoŭnikami AMAP u dvary ŭłasnaha doma. Pryčym milicyju, a mienavita supracoŭnikaŭ DAI, Žukoŭski sam ža i vyklikaŭ: hruzavyja aŭtamabili z susiedniaj budoŭli zabłakavali jamu ŭjezd u dvor, a na prośby vyzvalić prajezd ich vadzicieli nie reahavali. Na vyklik razam z supracoŭnikami DAI pryjechali supracoŭniki AMAP, jakija potym i zatrymali aktyvista, pastaviŭšy jamu ŭ vinu «niepadparadkavańnie zakonnym patrabavańniam supracoŭnikaŭ milicyi» (art. 23.4 KoAP).
Na sudzie Žukoŭski zajaviŭ, što nie ŭčyniaŭ pravaparušeńnia. Supracoŭnik DAI adrazu ž paśla pryjezdu zapatrabavaŭ ad aktyvista prajści ŭ słužbovy aŭtamabil, nie tłumačačy pryčyn. Kali Žukoŭski admoviŭsia, supracoŭniki AMAP «pravodzili» jaho ŭ słužbovy aŭtamabil, dastavili ŭ Centralny RAUS, a zatym u IČU, dzie žychar Homiela pravioŭ noč. Ranicaj pavinien byŭ adbycca sud, ale jaho adkłali da 28 žniŭnia, kab dać mahčymaść Žukoŭskamu znajści advakata i śviedak.
Aktyvist ličyć, što zatrymańnie było spłanavanaj akcyjaj z metaj pravučyć jaho. «Kala majho doma čatyry hady viadziecca budoŭla, pryčym sa šmatlikimi parušeńniami. Ja šmatrazova pisaŭ skarhi ŭ roznyja instancyi na parušeńni zakanadaŭstva. Voś zabudoŭščyk — «Centr-Lizinh» — i vyrašyŭ mianie pravučyć z dapamohaj milicyi», — ličyć zatrymany.
Jaho žonka na sudzie vystupała śviedkam. Jana pakazała, što ŭ toj dzień, 25 žniŭnia, viartałasia damoŭ i čuła, jak pradstaŭnik firmy-zabudoŭščyka havaryŭ vadzicielu aŭtamabila «MAZ», jaki i błakavaŭ ujezd u dvor Žukoŭskaha: «Kali źjavicca hety drobny paskudnik, ty viedaješ, što rabić».
Supracoŭniki AMAP i DAI śćviardžali na sudzie, što prosta paprasili žychara Homiela pakazać dakumienty, toj admoviŭsia i «pasprabavaŭ skrycca», heta značyć zajechać va ŭłasny dvor. Žukoŭski ža śćviardžaŭ, i ŭ jakaści dokazu padaŭ sudu videazapis, što jon pakazaŭ milicyi dakumienty, a mienavita pašpart. A prapanova prajści ŭ słužbovy aŭtamabil była niematyvavanaj. Jon prapanoŭvaŭ milicyi ŭ dvary abo ŭ domie razabracca.
Padčas sudovaha słuchańnia, na etapie abviaščeńnia materyjałaŭ spravy, u zału pasiadžeńnia zazirnuŭ milicyjanier-kanvojny z naručnikami ŭ rukach. Jon čakaŭ u kalidory, pakul sud vyniesie rašeńnie, a potym pravodziŭ Žukoŭskaha ŭ słužbovy aŭtamabil dla dastaŭki ŭ IČU.
«Usio tut zrazumieła. Sudździa jašče nie vynosiła rašeńnie, advakat i ja jašče nie vystupili z dokazami majoj nievinavataści — a ŭžo ŭ sud vyklikany kanvoj ź IČU. Heta spłanavanaja akcyja, kab pravučyć mianie i raźviazać ruki zabudoŭščyku, jaki parušaje zakanadaŭstva», — dadaŭ aktyvist.
