U rodavaj siadzibie Dziaržynskich, Dziaržynavie, što ŭ Nalibockaj puščy (Staŭbcoŭski rajon), adbyŭsia štohadovy ŭračysty rytuał paśviačeńnia maładych aficeraŭ u supracoŭniki orhanaŭ dziaržaŭnaj biaśpieki. Jak piša staŭbcoŭskaja rajonnaja hazieta «Pramień», ekskluzivam staŭ udzieł u im delehacyi Rasijskaj Fiederacyi, u składzie jakoj byli — upieršyniu — naščadki Fieliksa Dziaržynskaha, zasnavalnika savieckaha ČK.
Z Maskvy pryjechali staršy ŭnuk Dziaržynskaha, prafiesar Maskoŭskaha dziaržaŭnaha ŭniviersiteta Fieliks Janavič Dziaržynski, i daradca Pucina, staršynia asacyjacyi Hierojaŭ Savieckaha Sajuza Mikałaj Antoškin. Prysutničaŭ taksama staršynia vieteranskaj arhanizacyi KDB Biełarusi «Honar», zasłužany supracoŭnik orhanaŭ dziaržbiaśpieki Alaksiej Vasiljeŭ.
Jak adznačyŭ u svaim pryvitalnym słovie staršynia Kamiteta dziaržaŭnaj biaśpieki Valeryj Vakulčyk, takim čynam čekisty «addajuć daninu pavahi asobie hetaha čałavieka, jaho metanakiravanaści, sile voli i mudraści».
Na cyrymoniju pryvieźli vučniaŭ škoły ź Ciesnavoj, jakaja nosić imia Dziaržynskaha i źjaŭlajecca padšefnaj dla Kamiteta dziaržbiaśpieki. Ich pryniali ŭ kłub «Juny dziaržyniec». Kožnamu ź ich staršynia KDB asabista pacisnuŭ ruku.
Maładym ža aficeram uručyli słužbovyja paśviedčańni. Jany pryniali Kodeks honaru i paklalisia być sumlennymi, samaachviarnymi, viernymi doŭhu i ajčynie. Ale, jak vynikaje ź miesca i formy cyrymonii, ich ajčynaj zastajucca Rasija i SSSR.
Ź Biełaruśsiu Dziaržynskaha źviazvajuć tolki miesca naradžeńnia. Jon byŭ palakam pa vychavańni i savieckim čałaviekam pa vybary.
Ź jahonym imiem źviazana stvareńnie tatalitarnaj sistemy, ad jakoj tolki ŭ stalinskija časy ŭ Biełarusi paciarpieła kala 600 tysiač čałaviek, 200 tysiač niavinnych zahinuła. Siarod achviaraŭ sistemy byli, u tym liku, tysiačy supracoŭnikaŭ orhanaŭ biaśpieki. Sistema, takim čynam, vyniščała tych, čyimi rukami vioŭsia teror.
