Źjaviŭsia «kvaterny kalkulatar», jaki dazvalaje pa niekalkich klučavych paramietrach vyznačyć realny košt žylla ŭ Minsku. Biaspłatny servis dastupny na sajcie raspracoŭščyka — hrupy kampanij «Tvaja stalica», paviedamili jaje pradstaŭniki.
Kalkulatar imhnienna vyznačaje košt kvatery ŭ lubym žyłym domie, raźmieščanym u haradskoj miažy. Tak, pavodle źviestak servisu, adnapakajovaja kvatera ŭ Minsku kaštuje 65-70 tys. dołaraŭ. Cana typavoj «dvuški» składaje 85-90 tys., a na siaredniestatystyčnuju «trajačku» spatrebicca kala 110 tys. dołaraŭ.
Pry acency koštu ŭličvajucca takija faktary, jak miescaraźmiaščeńnie doma, jaho typ (panelny, cahlany abo karkasna-błočny) i pieryjad pabudovy, a taksama ahulnaja płošča kvatery i kolkaść pakojaŭ. Cana abjekta zaležyć ad pavierchu, najaŭnaści dobraha ramontu i mebli.
Dadatak pracuje na asnovie źviestak ab cenach pa ŭžo zaklučanych ździełkach i pakazvaje realny košt prodažu kvatery, jakaja niekalki nižej za canu ŭ rekłamnych abjavach. Tym samym instrumient uličvaje važnuju asablivaść rynku nieruchomaści, kali vialikaje značeńnie maje vieličynia skidki, jakaja robicca pradaŭcom. Jak pakazvaje praktyka, jana moža dasiahać 10-15% ad pieršapačatkova zajaŭlenaj cany.
Pavodle słoŭ raspracoŭščykaŭ, źviestki ab biahučych cenach buduć abnaŭlacca štomiesiac, a pry rezkich źmianieńniach na rynku — štotydniova.
Kvaterny kalkulatar pryznačany jak dla pradaŭcoŭ, tak i dla pakupnikoŭ žylla. «Časta abjekty na druhasnym rynku žylla vystaŭlajucca pa zavyšanych cenach, jakija źnižajucca ŭ vyniku tarhoŭ. Ciapier ža źjaviŭsia aryjencir dla farmiravańnia pieršapačatkovaj cany kvatery, što dazvolić zekanomić čas i paźbiehnuć pamyłak. Akramia taho, ciapier luby minčanin moža prosta dziela cikavaści daviedacca, kolki z na samaj spravie kaštuje jaho kvatera», — adznačyła namieśnik dyrektara pa prodažy na druhasnym rynku žylla «Tvaja stalica. Ahienctva nieruchomaści» Śviatłana Kudziełka.
Pavodle jaje słoŭ, «rynak atrymaŭ mahutny instrumient dla padaŭleńnia śpiekulatyŭnych nastrojaŭ». «Ciapier šmat zaležyć ad subjektyŭnych faktaraŭ: pradaŭcy raźličvajuć, što kvatery padaražejuć, pakupniki — što popyt ŭpadzie, ceny abvalacca, — rastłumačyła ekśpiert. — Dapuścim, pradaŭcy ŭziali i rezka ŭźniali ceny, ale pakupnik akazaŭsia nie hatovy i vyrašyŭ pačakać. Spadziejučysia tolki na ceny prapanovy ŭ rekłamnych abjavach, udzielniki rynku mohuć pamylacca adnosna realnaj situacyi na rynku i hublać čas. Tamu tak važna viedać realnuju karcinu. Kab i nie tanna pradać, i nie zaciahnuć praces na miesiacy i hady».
Skarystać kalkulatar možna pa spasyłcy http://www.t-s.by/buy/calculator.
Kalkulatar koštu kvater u Minsku raspracavany adździełam kansałtynhu i analityki hrupy kampanij «Tvaja stalica» na asnovie faktyčnych źviestak ab ździełkach z kvaterami ŭ Minsku, jakija supravadžaje ahienctva nieruchomaści.
