Minsielhascharč Biełarusi pavialičyŭ minimalnyja ekspartnyja ceny na ŭsie vidy syroŭ na 10 rubloŭ za kiłahram, paviedamlaje rasijski Nacyjanalny sajuz vytvorcaŭ małaka (Sajuzmałako).
Adznačajecca, što heta piataje pavyšeńnia paśla ŭviadzieńnia Rasijaj zabarony na ŭvoz niekatorych vidaŭ sielskahaspadarčaj pradukcyi ź ES, ZŠA i šerahu inšych krain.
«Ciapier minimalnyja ekspartnyja ceny na biełaruskija syry na ŭmovach FCA buduć vyšej amal na 5% i składuć nie mienš jak 215—220 rubloŭ za kiłahram. Da adpaviednaha pieryjadu minułaha hoda pavyšeńnie składaje amal 20%», — paviedamlaje Sajuzmałako.
U Kalininhradskaj vobłaści ceny na biełaruskaje charčavańnie paśla ŭviadzieńnia praduktovych sankcyj pavysilisia na 15—35% u zaležnaści ad hrupy tavaraŭ, pieradaje ITAR-TASS.
Tak, pavodle źviestak rehijanalnaha ministerstva ekanomiki, adpusknaja cana na roznyja hatunki syru pavialičyłasia na 15—35%. Pradukcyja, što pastaŭlajecca ŭ vobłaść pad brendam «Savuškaŭ pradukt» (małočnyja, kisłamałočnyja pradukty, syry, tvaroh), padaražeła ŭ siarednim na 20%.
Kalininhradskija pradpryjemstvy, zaniatyja pierapracoŭkaj małaka, źviarnuli ŭvahu na pieraboi ŭ pastaŭkach biełaruskaj syraviny.
U kalininhradskim uradzie vykazali zakłapočanaść cenavoj palitykaj biełaruskich pastaŭščykoŭ i paviedamili, što ŭ pačatku śniežnia płanujuć abmierkavać pytańnie charčovych pastavak u Minsku na čarhovym pasiadžeńni rasijska-biełaruskaha savieta pa doŭhaterminovym supracoŭnictvie.
Adznačym, što ŭ žniŭni Kalininhradskaja vobłaść i Biełaruś damovilisia ab naroščvańni supracoŭnictva, u tym liku ŭ vyrašeńni pytańnia ab zamiaščeńni impartu praduktaŭ ź jeŭrapiejskich krain, na jakija ŭviedzienaje embarha.
Nahadajem, na niadaŭniaj pres-kanfierencyi dla rasijskich ŚMI Alaksandr Łukašenka padkreśliŭ, što rost cen na biełaruskaje charčavańnie ŭ Rasii adbyvajecca nie pa vinie Biełarusi. «U nas na 5—8% cana vyrasła, a ŭ vas na 30—50%. Ale heta pa vašaj pryčynie, tamu nie treba błakavać pastaŭki praduktaŭ charčavańnia», — skazaŭ jon. Biełaruś, zaŭvažyŭ Łukašenka, pastaŭlaje charčavańnie aptavikam, jakija zatym pierapradajuć jaho dla handlovych sietak, dzie ceny i pavyšajucca.
Kiraŭnik dziaržavy padkreśliŭ, što pamiž Biełaruśsiu i Rasijaj dahetul isnujuć bałansy pa pastaŭkach praduktaŭ, jakija rehulujuć, kolki i jakoj pradukcyi moža być pastaŭlena. «Vašy łabisty bajacca, što kali my pastavim bolš, to ceny ŭpaduć. Vašy pryvatniki chočuć kišeniu chutčej nabić. Niachaj kankurujuć ź biełarusami. Prapanoŭvaju nie strymlivać pastaŭki biełaruskich tavaraŭ na rasijski rynak», — zajaviŭ Łukašenka.
