Jak Ełan Mask zmahajecca sa sastarełaju industryjaj bienzinavych aŭtamabilaŭ.
Dla samaha jaskravaha aŭtavytvorcy našych dzion hety hod prachodzić jak nikoli ŭdała. Ełan Mask, jakoha nazyvajuć novym Styvam Džobsam, narešcie zrabiŭ Tesla finansava stabilnaju i raźvivaje pośpiech. Na jaho baku i inviestary: Tesla płanuje ŭ hetym hodzie vypuścić 35 000 aŭtamabilaŭ. Kampanija kaštuje amal $ 30 młrd. Dla paraŭnańnia, taki hihant, jak General Motors, z prodažam bolš za 10 młn. aŭto na hod, aceńvajecca «ŭsiaho» na $ 48 młrd. Tesla atrymała taki davier rynku dziakujučy inavacyjam i dasiahnieńniam. Voś samyja značnyja rečy, jakija dakazała Tesla.
Elektrakary mohuć być masavym praduktam
Da Tesla ŭsie elektramabili byli prosta pryhožymi kancept-karami na mižnarodnych sałonach. Kampanija ž pieršaja pakazała śvietu, što na ich možna pabudavać ceły biźnies. U 2009 hodzie Tesla pradała 800 aŭtamabilaŭ, prajšło piać hadoŭ, i Tesla płanuje pradać užo 100 000 u 2015-m. Takomu vybuchnomu rostu dapamahła stratehija Ełana Maska.
Spačatku kampanija raspracavała darahi sportkar — Tesla Roadster, jaki pryciahnuŭ uvahu aŭtaamataraŭ i miedyjaŭ, a taksama dazvoliŭ adpracavać technałohii. Na hetym padmurku kampanija stvaryła luksavy siedan — kankurent Mercedes i BMW. Heta Tesla Model S, jaki zastajecca vysokamaržynalnym praduktam, ale pry hetym raschodzicca vialikimi partyjami. I tolki paśla kampanija płanuje vypuścić pa-sapraŭdnamu masavy elektrakar Tesla Model 3, jaki z canoju $ 35 000 baluča ŭdaryć pa rynku bienzinavych aŭto.
Ale pierad vychadam Model 3, Tesla imkniecca achapić jak maha bolej rynkaŭ. Pačaŭšy z ZŠA, ciapier kampanija zachoplivaje Jeŭropu i budzie sprabavać vyjści na samy vialiki rynak elektrakaraŭ - kitajski.
Elektrakary nie mienš zručnyja za zvyčajny aŭtamabil
Dla ŭsich elektramabilaŭ hałoŭnym vuzkim miescam zastajecca prabieh na adnym zaradu batarei. Navat siońnia kankurenty Tesla vypuskajuć mašyny, na jakich možna prajechać nie bolš za 160 km. Heta zahaniaje elektrakary ŭ ramki haradskich aŭto, što pry vialikich cenach robić ich zusim nišavymi.
Na Model S možna prajechać bolš za 400 km. I pry canie siedanu kłasu luks, Model S vyhladaje, jak siedan kłasu luks, prapanoŭvaje taki ž funkcyjanał i hetak ža naładavany elektronikaju.
Druhi vyznačalny faktar — nasyčanaja sietka biaspłatnych zaradnych stancyjaŭ. Ułasnaja technałohija chutkasnaj zaradki za 40 chvilinaŭ adnaŭlaje akumulatar na 80 %. Da kanca nastupnaha hodu ZŠA razam z bolšaj častkaj Zachodniaj Jeŭropy buduć całkam pakrytyja hetymi stancyjami. A ŭ 2016-ym stancyi źjaviacca i va ŭsich krainach-susiedkach Biełarusi. Hetak ža da budaŭnictva dałučajucca kankurenty Tesla, naprykład, BMW i sietki zapravak. I choć pakul u Jeŭropie niama ŭnifikavanaha raźjomu, chutka prablemaŭ z mahčymaściu zaradki pa-za miežami domu zrobicca značna mienš.
Aŭtapiłoty hatovyja kiravać aŭto
Jak vizijanier, Ełan Mask prahnie čym chutčej uvieści aŭtapiłot. Navat siońnia apošnija madyfikacyi Model S mohuć sami adroźnivać darožnyja znaki, rehulavać u adpaviednaści ź imi chutkaść i majuć radary, kab bačyć inšyja aŭtamabili na darozie. U vyniku aŭto zdolnaje samastojna mianiać pałosy ruchu, pavaročvać i navat parkavacca biez dapamohi čałavieka.
Ale Ełan Mask nie spyniajecca na hetym: «Našaja madel 2015 h. budzie ŭ stanie 90 % šlachu jechać na aŭtapiłocie». Inšyja vytvorcy taksama majuć šmat dasiahnieńniaŭ u hetym kirunku, ale mienavita Tesla prapanoŭvaje samy kompleksny i daskanały aŭtapiłot. Pa sutnaści heta mašyna budučyni, jakuju možna nabyć užo siońnia.
Dla raspaŭsiudu sapraŭdnych inavacyjaŭ nieabchodna admovicca ad patentaŭ
Na pačatku svajoj dziejnaści kampanija imknułasia patentavać usie svaje vynachodnictvy. Maleńki startap bajaŭsia bienzinavych akułaŭ, jaki skraduć jaho patenty i vyrabiać proćmu lepšych elektrakaraŭ. Adnak paźniej Ełan Mask zrazumieŭ, što vialikija kampanii cudoŭna žyvuć prodažam kłasičnych aŭto i elektrakary im patrebnyja tolki dla paciechi.
U takoj situacyi patenty zapavolvajuć raźvićcio ŭsioj haliny elektrakaraŭ, bo nie dajuć svabody takim ža maładym startapam. Mienšaja kolkaść patentaŭ tolki b pavialičyła kankurencyju pamiž vytvorcami, paskoryła inavacyi i raspaŭsiudziła isnyja technałohii. U vyniku, letam 2014 h. Tesla addała ŭsie svaje patenty ŭ publičnaje karystańnie sa słovami: «Našyja vorahi nie maleńkija kampanii, jakija vypuskajuć elektrakary, a vializnyja armady bienzinavych aŭto, jakija zabrudžvajuć našuju płanietu».
Budučynia za elektryčnaściu
Kiraŭnik Tesla razumieje, što čas bienzinu sychodzić i heta pašyryć dolu ŭžyvańnia elektryčnaści. Tamu ciapier kampanija buduje samuju vialikuju ŭ śviecie fabryku dla vytvorčaści akumulataraŭ. Da 2020-aha jana budzie zabiaśpiečvać 500 000 elektrakaraŭ na hod i źmienšyć sabiekošt aŭtamabilu.
Plusy elektryčnaści nie tolki ŭ tym, što jana bolš ekałahičnaja, ale taksama i ŭ raznastajnaści krynicaŭ vyrabu. Mahčymaść takoj dyviersifikacyi syraviny daje ahromistyja pierśpiektyvy dla rostu ŭžyvańnia.
Siońnia samym dynamičnym rynkam paśla ZŠA ŭ roście elektrakaraŭ robicca Kitaj. Miascovyja ŭłady stymulujuć svaich vytvorcaŭ i razam ź imi staviać hrandyjoznyja płany. Užo da kanca 2015 h. kitajskija vytvorcy płanujuć pradać 500 000 elektrakaraŭ i hibrydaŭ, što ź liškam pakryvaje rekordy Tesla.
Biełaruś, dziakujučy svaim adnosna nievialikim cenam na bienzin, nie ŭdzielničaje ŭ hetym pracesie. Pakul ceny na novyja elektrakary nie ŭpaduć, a na naftu nie padskočać, to Tesla buduć sustrakacca na našych darohach tolki ŭ jakaści cacak zamožnych suajčyńnikaŭ.
