Biełaruś da 11 listapada prypyniaje pastaŭki śvininy ŭ Rasiju. Pra heta ŭ čaćvier na pieramovach damovilisia kiraŭnik Raśsielhasnahladu Siarhiej Dankviert i ministr sielskaj haspadarki Biełarusi Leanid Zajac.
Prypynieńnie pastavak farmalna źviazanaje z tym, što ŭ pradukcyi čatyroch biełaruskich miasakambinataŭ vyjavili hienom afrykanskaj čumy śviniej (AČS). Abmiežavańni datyčać astudžanaj i zamarožanaj śvininy, subpraduktaŭ.
Ale ŭ realnaści heta moža być šantaž Rasii z metaj źmianić pazicyju Biełarusi pa ŭkrainskim pytańni. I kara za re-ekspart sielhaspradukcyi ź ES u abychod rasijskaha embarha.
Jak paviedamlaje interfax.by sa spasyłkaj na Raśsielhasnahlad, havorka nie idzie pra zabaronu pastavak śvininy ŭ Rasiju. Dziaržvietsłužba Biełarusi spyniaje siertyfikacyju pradukcyi śvinahadoŭli dla rasijskaha rynku ŭ adpaviednaści z režymam samaabmiežavańnia, jaki dziejničaje pamiž dźviuma krainami.
Dalejšyja dziejańni majuć być uzhodnienyja na pracoŭnaj sustrečy 11 listapada.
Hienom AČS nibyta byŭ znojdzieny ŭ pradukcyi Aršanskaha, Minskaha, Mahiloŭskaha i Babrujskaha miasakambinataŭ. U toj ža čas hety hienom amal harantavana budzie prysutničać i ŭ rasijskaj pradukcyi z rehijonaŭ, jakija začapiła AČS.
Raniej Raśsielhasnahlad uvodziŭ zabarony na pastaŭki biełaruskaha małaka, małdaŭskaha vina, hruzinskaj minieralnaj vady i ŭkrainskich sokaŭ u pieryjady, kali Rasija ažyćciaŭlała palityčny cisk na hetyja krainy, niahledziačy na vysokuju jakaść hetaj pradukcyi.
