Pra heta paviedamiŭ namieśnik načalnika adździeła kansałtynhu i analityki hrupy kampanij «Tvaja stalica» Andrej Čarnyšoŭ.
U paraŭnańni ź vieraśniem u kastryčniku siaredniaja cana kv. m novabudoŭlaŭ kłasa standart pavialičyłasia niaznačna — na 1%, ci 10 dołaraŭ, da ŭzroŭniu 1.590 dołaraŭ. U pryvatnaści, siaredniaja cana kv. m adnapakajovych kvater u kłasie standart u kastryčniku skłała 1.680 dołaraŭ, dvuchpakajovych — 1.600 dołaraŭ i trochpakajovych — 1.560 dołaraŭ. Pa astatnich kłasach jakaści žylla ceny zastalisia na raniejšym uzroŭni. «Pačynajučy z druhoha kvartała hetaha hoda siaredniaja cana kv. m na piarvičnym rynku spyniłasia na adznacy 1.670 dołaraŭ/kv. m i ŭ nastupnym tolki niaznačna bałansuje vakoł jaje», — adznačyŭ ekśpiert.
Biez uliku kłasnaści žylla samym darahim rajonam u kastryčniku vystupaŭ Pieršamajski (1.985 dołaraŭ), samymi tannymi — Maskoŭski (1.500) i Frunzienski (1.490) rajony.
«Pakupnickaja aktyŭnaść na rynku praciahvaje zastavacca stabilnaj, niahledziačy na adsutnaść užo dosyć doŭhi čas dastupnych kredytnych resursaŭ. Apošnim časam usio bolš pakupnikoŭ z druhasnaha rynku prychodziać pa kuplu na piarvičny rynak», — adznačyŭ Čarnyšoŭ.
Na druhasnym rynku žylla siaredni košt kv. m u kvaterach standartnych spažyvieckich jakaściaŭ u kastryčniku zastałasia ŭ paraŭnańni z cenami papiarednich miesiacaŭ na raniejšym uzroŭni. Pa fakcie zaklučanych ździełak siaredniaja cana sfarmiravałasia na ŭzroŭni 1.630 dołaraŭ/kv. m: adnapakajovych — 1.750, dvuchpakajovych —1.530, trochpakajovych — 1.535. «Charakterna, što ŭ kastryčniku cana kvadratnaha mietra trochpakajovych kvater sfarmiravałasia na ŭzroŭni dvuchpakajovych», — adznačyŭ ekśpiert.
Dla kvater, jakija majuć bazavy nabor mebli (kuchnia, stoł, kresły, kanapa/łožak, šafa-kupe), bytavuju techniku (chaładzilnik, televizar, mikrachvalevaja pieč, pralnaja mašyna-aŭtamat) i akuratny ramont (padłohi linoleum ci łaminat, špalery bieź istotnych defiektaŭ, azdableńnie ścien vannaha pakoja i sanvuzła kaflaj),
košt arendy ŭ kastryčniku zastaŭsia na ŭzroŭni vieraśnia: adnapakajovyja — 350 dołaraŭ/miesiac, dvuchpakajovyja — 430, trochpakajovyja — 490.
«Heta śviedčyć ab tym, što hetyja ceny arendy ciapier źjaŭlajucca prymalnymi dla rynku», — ličyć śpiecyjalist.
Aktualnyja ceny arendy kvater, jakija zdajuć biez mebli i ŭsiaho tolki ŭ zdavalniajučym stanie, źnizilisia prykładna na 5-7% i skłali 310 dołaraŭ/miesiac dla adnapakajovych, 390 — dla dvuchpakajovych i 440 — dla trochpakajovych. Ceny pryviedzienyja biez koštu kamunalnych pasłuh.
