Fota Siarhieja Hudzilina.
Sud Maskoŭskaha rajona Minska 27 listapada admianiŭ štraf, vyniesieny namieśnikam načalnika Maskoŭskaha RUUS u dačynieńni da aktyvista maładziožnaha kryła «Zmiena» kampanii «Havary praŭdu» Paŭła Vinahradava. Pra heta paviedamlaje ahienctva BiełaPAN sa spasyłkaj na sajt pravaabaroncaŭ-viasnoŭcaŭ.
Zhodna z pratakołam ab učynieńni administracyjnaha pravaparušeńnia, ranicaj 8 kastryčnika Vinahradaŭ znachodziŭsia ŭ hramadskim miescy (adździaleńni milicyi) u niećviarozym stanie, chistaŭsia z boku ŭ bok, raspaŭsiudžvajučy ŭ kabiniecie pach ałkaholu.
Vinahradaŭ, znajomiačysia z pratakołam ahladu, nie zhadziŭsia ź jaho vynikami. Jon zrabiŭ zapis u pratakole ab tym, što jaho nie dastaŭlali ŭ miedycynskuju ŭstanovu dla ahladu na najaŭnaść ałkaholu, jak heta rehłamientujecca adpaviednaj instrukcyjaj, i admoviŭsia pryznać svaju vinu.
Tym nie mienš, namieśnik načalnika Maskoŭskaha RUUS 9 kastryčnika vynies pastanovu, zhodna ź jakoj Vinahradaŭ pryznany vinavatym va ŭčynieńni pravaparušeńnia pa art. 17.3 KoAP (znachodžańnie ŭ niećviarozym stanie ŭ hramadskim miescy) i aštrafavany na 1 młn. 200 tys. rubloŭ.
Sudździa suda Maskoŭskaha rajona Taćciana Matyl pryznała, što pry razhladzie spravy byli dapuščanyja nieabjektyŭnaje daśledavańnie abstavinaŭ administracyjnaha pravaparušeńnia i adnabakovaść pry razhladzie materyjałaŭ spravy. Jana admianiła pastanovu namieśnika načalnika Maskoŭskaha RUUS ab administracyjnym pravaparušeńni i nakiravała spravu na novy razhlad.
Hladzicie taksama: «Nie chaču być palitałkaholikam»: Pavieł Vinahradaŭ źjazdžaje ź Minska