U Rasii adbyłosia čarhovaje žudasnaje zabojstva. U Rastovie-na-Donie siońnia pravaachoŭniki zatrymali 25-hadovaha mužčynu, jaki sprabavaŭ pravieźci ŭ aŭtobusie rasčlaniony trup svajho baćki. Adnak złačynca nie dastatkova daskanała pradumaŭ płan transpartyroŭki i zachavańnia cieła: padčas pieravozki trupa jon pryciahnuŭ uvahu navakolnych pasažyraŭ, jakich spałochaŭ niepryjemny pach ad mužčyny.
Ranicaj 7 śniežnia ŭ Pieršamajskim rajonie Rastova-na-Donie ŭ palicyju źviarnuŭsia kiroŭca rejsavaha aŭtobusa №94. Pavodle jaho słoŭ, pasažyry paskardzilisia jamu, što ad adnaho z mužčyn zychodzić niepryjemny, padobny na trupny, pach. Pravaachoŭniki, jakija padjechali adrazu da prypynku aŭtobusa, zatrymali mužčynu, što pieravoziŭ čamadan. U im, jak akazałasia, znachodzilisia reštki rasčlanionaha trupa.
«Na miescy zatrymali 25-hadovaha rastaŭčanina, jon znachodziŭsia ŭ stanie ałkaholnaha apjanieńnia, — prakamientavali ŭ MUS pa Rastoŭskaj vobłaści. — Padčas ahladu ŭ jaho sumcy byli znojdzienyja i kanfiskavanyja frahmienty čałaviečaha cieła».
Padazravany Alaksiej Kuźmienka ŭžo daje pryznalnyja pakazańni. Pavodle infarmacyi Śledčaha ŭpraŭleńnia SK pa Rastoŭskaj vobłaści, małady čałaviek niekalki dzion tamu ŭ čas svarki sa svaim 56-hadovym baćkam nanios jamu niekalki ŭdaraŭ biejsbolnaj bitaj pa hałavie. Ad atrymanych traŭmaŭ mužčyna pamior. Kab schavać zabojstva, rastaŭčanin raździaliŭ cieła i vyrašyŭ pa častkach vyvieźci jaho za horad.
Taksama Kuźmienka pryznaŭsia pravaachoŭnikam, što ŭžo schavaŭ niekatoryja častki cieła svajho zabitaha baćki. Tak, pravuju nahu jon zakapaŭ za haražami niedaloka ad doma, dzie było ździejśniena złačynstva, levuju nahu, hałavu i dźvie ruki – pakinuŭ u zakinutym budynku dziciačaha sadu. A tors zabitaha mužčyny jon i chacieŭ vyvieźci ŭ tym samym čamadanie, z-za jakoha byŭ zatrymany.
«Uzbudžanaja kryminalnaja sprava pa artykule «Zabojstva», — paviedamiła staršy pamočnik kiraŭnika Śledčaha ŭpraŭleńnia SK Rasii pa Rastoŭskaj vobłaści Halina Hahałajeva. - Pa papiaredniaj infarmacyi, padazravany staić na ŭliku ŭ psichijatra. Vyśviatlajucca ŭsie akaličnaści. Vyrašajecca pytańnie ab abrańni ŭ dačynieńni da padazravanaha miery strymańnia ŭ vyhladzie zaklučeńnia pad vartu».
