U adnosinach Biełarusi i Rasii źjaviłasia šmat tem, jakija treba vyrašać, zajaviŭ Alaksandr Łukašenka 9 śniežnia na sustrečy ź dziaržaŭnym sakratarom Sajuznaj dziaržavy Ryhoram Rapotam.
Jak paviedamlaje pres-słužba prezidenta, na sustrečy abmiarkoŭvalisia pytańni padrychtoŭki da pasiadžeńnia Vyšejšaha Dziaržaŭnaha Savieta Sajuznaj dziaržavy, jakoje adbudziecca ŭ kancy śniežnia ŭ Maskvie. Baki abmierkavali temy, jakija buduć vyniesienyja na razhlad na vyšejšym uzroŭni. Dakładnaja data praviadzieńnia pasiadžeńnia pakul nie vyznačana.
«Ja nie chaču ŭtojvać heta ad hramadskaści — u nas uźnikła niekatoraje roznahałośsie ŭ suviazi z prapanovaj, tak miarkuju, rasijskaha boku, ab tym, kab 23 śniežnia pravieści ŭsio ŭ adzin dzień — ADKB, Jeŭrazijski ekanamičny sajuz, Vyšejšy Dziaržaŭny Saviet i hetak dalej i da taho padobnaje. Kali pravodzić, to treba rabić heta hruntoŭna.
My i tak užo pierad ludźmi i ŭ Rasii, i ŭ Biełarusi nie vielmi prystojna vyhladajem z farmiravańniem paŭnacennaj Sajuznaj dziaržavy, a jašče ŭ farmalizm pieratvarać naša mierapryjemstva, napeŭna, budzie niapravilna»,
— ličyć Alaksandr Łukašenka.
Jon adznačyŭ, što chacieŭ by pačuć punkt hledžańnia Ryhora Rapoty jak dziaržsakratara pa hetych pytańniach. «Tym bolš što (Vy heta viedajecie, dziakuj, što bieracie ŭdzieł u vyrašeńni hetych pytańniaŭ) źjaviłasia šmat tem, jakija treba vyrašać, u biełaruska-rasijskich adnosinach. Samyja ciesnyja adnosiny dźviuch dziaržaŭ, dvuch narodaŭ, i my siońnia vymušanyja kanstatavać, što my stvarajem prablemy na roŭnym miescy, — adznačyŭ kiraŭnik dziaržavy. —
Mnie zdajecca, rasijanam niama ŭ čym nas papraknuć, my robim usio, jak my damovilisia».
Adnosna temy pastavak biełaruskaj pradukcyi ŭ Rasiju Łukašenka padkreśliŭ: «Vy nas paprasili pastavić voś hetyja abjomy małočnych i miasnych praduktaŭ, ryby i hetak dalej, usio raśpisali. Dyk jašče hetyja kvoty nie vybranyja, my jašče nie pastavili hetyja abjomy. Što ž nas paprakać, što my ŭžo zanadta pierakarmili vas, rasijan. I potym, heta naohuł nie salidna. My voś na hetuju temu mała źviartajem uvahu, ale heta nie značyć, što jana nie isnuje. Heta nie toje što niadobrasumlennaja kankurencyja, heta naohuł naš brat rodny (rasijanie), jon ža nie prosta nie puskaje našu pradukcyju — stvaraje joj antyrekłamu, zajaŭlajučy pra toje, što jana niebiaśpiečnaja i jašče tam čahości. Vy, jak čałaviek, jaki pastajanna kuplaje biełaruskaje, skažycie: u čym niebiaśpieka našaj pradukcyi? Bo my na paradak vyšejšyja ŭ hetych pytańniach za rasijan. Dyk treba ŭ Rasii pahladzieć, jakaja biaśpieka vyrablenych u ich praduktaŭ».
Łukašenka kanstatavaŭ, što ŭ Biełarusi zachavali savieckija DASTy, uzmacnili ich žorstkaść.
«Rasija daŭno ŭžo zabyłasia, što takoje DASTy, tam niejkija TA, techničnyja rehłamienty ci ŭmovy.
Jasna, što kožny dla siabie ich stvaraje. Ale i potym, na palicach lažać roznyja pradukty — ź Jeŭropy, Amieryki, Rasii, Kazachstana i Biełarusi. Chaj rasijanie raźbirajucca, što kuplać. My — za hetuju kankurencyju, nam i ŭ hetym admaŭlajuć».
«Tamu nazapasiłasia šmat prablem, jakija siońnia treba vyrašać. I ŭziać u adzin dzień pravieści mierapryjemstvy — prosta ŭsio ŭ kuču skamiečym i vynikaŭ nie atrymajem», — ličyć kiraŭnik dziaržavy.
Jon vykazaŭsia za adkryty dyjałoh z rasijskim bokam pa ŭsich pytańniach:
«Ciamnić nam niama čaho adzin pierad adnym, ciapier situacyja nie taja, kab hulać u niejkija dypłamatyčnyja hulni, niejkija vykrutasy».
U svaju čarhu Ryhor Rapota pahadziŭsia z Alaksandram Łukašenkam, što źjaviłasia šmat pytańniaŭ, jakija treba hruntoŭna abmierkavać. Dziaržsakratar adznačyŭ: «Jość ab čym havaryć, i treba chutka znachodzić rašeńni i zdymać hetu napružanaść. Jość šerah inšych pytańniaŭ, jakija patrabujuć sistemnaha padychodu i adkrytaha dyjałohu».
