Z 1 studzienia ŭ Litvie ŭviedziena ahulnaja valuta Jeŭrapiejskaha sajuza — jeŭra. Litva stała 19-m členam zony jeŭra.
Prezident krainy Dala Hrybaŭskajcie ŭ navahodnim vinšavańni nazvała ŭviadzieńnie jeŭra «mahčymaściu raści i być sučasnaj jeŭrapiejskaj dziaržavaj, stavić pierad saboj novyja mety i śmieła hladzieć u budučyniu».
Nieŭzabavie paśla apoŭnačy pieršyja banknoty jeŭra z bankamata ŭ centry Vilni dastaŭ premjer Alhirdas Butkiavičus.
«Jeŭra budzie harantam našaj ekanamičnaj i palityčnaj biaśpieki, dazvolić bolš intensiŭna raźvivać ekanomiku, spryjajučy stvareńniu novych pracoŭnych miescaŭ i pavieličeńniu dachodaŭ nasielnictva», - vinšujučy žycharoŭ Litvy, skazaŭ premjer.
«Simvał lita Pahonia stanovicca adnym z znakaŭ siamji jeŭra. Rycar u daśpiechach ź miečam i ščytom budzie adčakanieny na manietach jeŭra», - dadaŭ jon.
U mierapryjemstvie taksama pryniali ŭdzieł estonski premjer Taavi Ryjvas, kiraŭnik MZS Łatvii Edhar Rynkievič, jeŭrakamisar Vicianis Andrukajcis, ministr finansaŭ Rymantas Šadžus i kiraŭnik praŭleńnia Centrabanka Litvy Vitas Vasilaŭskas. Jany taksama źniali pa 10 jeŭra.
U litoŭskich kafe, restaranach i barach nočču pradstaŭleny śpiecyjalny biezałkaholny kaktejl-jeŭra.
Lit byŭ «pryviazany» da jeŭra z 2002 hoda, tamu Litva zaležała ad palityki Jeŭrapiejskaha Centrabanka, adnak nie mieła prava hołasu.
Ad 1 studzienia 2015 hoda lity ŭ Litvie buduć abmieńvać na jeŭra biaspłatna:
• 6 miesiacaŭ heta možna budzie zrabić va ŭsich bankaŭskich adździaleńniach (maniety i banknoty);
• praz 6 miesiacaŭ paśla ŭviadzieńnia jeŭra heta možna budzie zrabić u tych adździaleńniach bankaŭ, jakija vyznačyć Centrabank Litvy — prymać buduć banknoty;
• na praciahu 60 dzion z momantu ŭviadzieńnia jeŭra možna budzie abmianiać lity na jeŭra ŭ adździaleńniach Litoŭskaj pošty (maniety i banknoty);
• nieabmiežavany čas — u Centrabanku Litvy.
