Uładalniki sajtaŭ buduć nieści adkaznaść za niekarektnyja kamientary karystalnikaŭ, zajaviła ministr infarmacyi Lilija Ananič padčas anłajn-kanfierencyi na sajcie dziaržaŭnaha infarmahienctva BiełTA.
«Pavodle zakonu ab ŚMI adkaznaść niasie ŭładalnik sajta. Orhan dziaržaŭnaha kiravańnia, jaki abaviazany ažyćciaŭlać kantrol za vykanańniem zakanadaŭstva ŭ hetaj śfiery, budzie vynosić uładalnikam resursaŭ papiaredžańnie, kali ŭ kamientarach źmiaščajecca infarmacyja, raspaŭsiud jakoj abo zabaronieny zakonam, albo nanosić škodu dziaržaŭnym i hramadskim intaresam, albo maje niepraŭdzivuju, abraźlivuju infarmacyju», — skazała jana.
Pa słovach ministra, kali kamientar budzie ŭtrymlivać abrazu kankretnaha hramadzianina, hety čałaviek moža padać u sud na jaho aŭtara. «Adna adkaznaść nie pahłynaje inšuju. U ciapierašni čas Ministerstva infarmacyi vyznačaje pieralik narmatyŭnych pravavych aktaŭ, jakija patrabujuć udakładnieńnia paśla pryniaćcia zakona ab ŚMI», — padkreśliła jana.
Na pytańnie, ci ličacca srodkami masavaj infarmacyi forumy i błohi, Ananič adkazała, što pad dziejańnie zakona ab ŚMI padpadajuć pradukcyja srodkaŭ masavaj infarmacyi, jakaja raspaŭsiudžvajecca z dapamohaj internet-resursaŭ, i ich sastaŭnyja častki. «Značyć, usio, što niasie internet-resurs, źjaŭlajecca pradukcyjaj ŚMI. Adkaznaść za źmiest kantentu lažyć na ŭładalnikach internet-resursaŭ», — skazała jana i dadała, što ŭ hramadzianina jość taksama prava padać zajaŭku na akredytacyju pry dziaržorhanach, jakija, adnak, mohuć razhledzieć jaje i pryniać svajo rašeńnie.
«Zakon ab ŚMI nijakim čynam nie pryciskaje svabodu ŭ internecie, kali jaje ŭsprymać z punktu hledžańnia hramadzianina Respubliki Biełaruś, patryjota svajoj krainy», — ličyć Ananič.
Dapaŭnieńni i źmieny ŭ zakon ab ŚMI byli pryniatyja 17 śniežnia Pałataj pradstaŭnikoŭ adrazu ŭ dvuch čytańniach, a na nastupny dzień — adobranyja Savietam Respubliki Nacyjanalnaha schodu. 20 śniežnia dakumient padpisaŭ Alaksandr Łukašenka. Dziejańnie abnoŭlenaha zakona ab ŚMI raspaŭsiudžvajecca na infarmacyjnyja internet-resursy, za vyklučeńniem patrabavańnia ab dziaržaŭnaj rehistracyi.
