Manastyry i chramy ciapier abaviazany atrymlivać śpiecyjalnaje błahasłavieńnie na adkryćcio carkoŭnych kram i vykarystańnie skryniaŭ dla achviaravańniaŭ za miežami svajoj terytoryi. Ab hetym na pres-kanfierencyi 20 studzienia ŭ Minsku paviedamiŭ mitrapalit Minski i Zasłaŭski Pavieł, patryjaršy ekzarch usiaje Biełarusi.
Pavodle jaho słoŭ, heta zroblena dla ŭparadkavańnia viadzieńnia spraŭ u chramach i manastyrach, a taksama dla baraćby z machlarami, jakija źbirajuć achviaravańni pad vyhladam pradstaŭnikoŭ carkvy. «Vielmi časta zdarajucca takija epizody, kali pad vyhladam zboru achviaravańniaŭ na chram hetyja skarbonki vykarystoŭvajuć ludzi zusim niecarkoŭnyja», — patłumačyŭ mitrapalit Pavieł.
Ciapier luby hramadzianin moža paprasić dla aznajamleńnia ŭ carkoŭnaj kramie abo ŭ pradstaŭnika chrama, jaki źbiraje achviaravańni, vydadzieny BPC siertyfikat-błahasłavieńnie. «Kali vy projdziecie i pahladzicie, to možacie znajści tych ludziej, jakija časam navat apranajuć padraśniki, skufju, biaruć tablički, što jany źbirajuć achviaravańnie dla chrama, ale na samoj spravie heta niapraŭda», — adznačyŭ patryjaršy ekzarch.
Pradstajaciel BPC taksama źviarnuŭ uvahu na toje, što carkoŭnyja kramy pavinny pradavać tolki licenzavany i siertyfikavany tavar. Akramia taho, pavodle jaho słoŭ, carkoŭnyja kramy nie pavinny pradavać śviatuju vadu. «Heta nonsiens. Kali vy sapraŭdy chočacie ludziam dapamahčy, to vy im prapanujcie. Kali tolki ja daviedajusia, što chtości pradaje śviatuju vadu, to budu ich karać», — skazaŭ Pavieł, dadaŭšy, što śviatuju vadu možna razdavać u kramach za dobraachvotnyja achviaravańni.
