biatlonworld.com
Trochrazovaja alimpijskaja čempijonka, biełaruska Darja Domračava, paśla tryumfu ŭ piatnicu ŭ spryncie na 6-m etapie Kubka śvietu pa bijatłonie, vyjhrała siońnia, 24 studzienia, u italjanskim Antcholcy honku pieraśledu.
Domračava prabiehła dystancyju za 30 chvilin 58,5 siekundy, zrabiŭšy tolki adzin promach na čatyroch rubiažach (pieršaja stralba). Darečy, heta treciaja zapar pieramoha Darji na etapach Kubka śvietu.
Druhoje miesca siońnia zaniała rasijanka Darja Virałajnien (+1,21,0). Treciaja — finka Kajsa Miakiarajnien (+1,29,0).
U ahulnym zaliku Kubka śvietu adstavańnie Domračavaj ad Miakiarajnien skaraciłasia da 40 bałaŭ: 620 da 660 bałaŭ.
U niadzielu ŭ Antcholcy projduć mužčynskaja i žanočaja estafiety.
Siomy etap Kubka śvietu projdzie z 6 pa 8 lutaha ŭ Čechii.
