Paŭnočnaatłantyčny aljans stvaraje šeść novych kamandnych centraŭ u krainach Uschodniaj Jeŭropy, abviaściŭ hienieralny sakratar NATO Jens Stołtenbierh. Takaja miera, rastłumačyŭ Stołtenbierh, prymajecca ŭ adkaz na ŭzrosłuju pahrozu ahresiŭnych dziejańniaŭ z boku RF.
europeanleadershipnetwork.org
Kamandnyja centry, u zadaču jakich budzie ŭvachodzić kaardynacyja dziejańniaŭ miascovych uzbrojenych sił i NATO, u bližejšy čas źjaviacca ŭ Estonii, Łatvii, Litvie, Polščy i Bałharyi.
U kožnym z takich centraŭ budzie baziravacca nievialikaja hrupa vajskoŭcaŭ NATO. Dakładnaja kolkaść takich hrup pakul nie paviedamlajecca, viadoma tolki, što havorka idzie prykładna pra 50 vajskoŭcaŭ z roznych krain Aljansu ŭ kožnym z kamandnych centraŭ.
Miarkujecca, što stvareńnie kamandnych centraŭ budzie zavieršana da 2016 hoda, a kiraŭnictva kožnym ź ich voźmie na siabie adna z krain Aljansu.
Kančatkova rašeńnie ab kanfihuracyi kamandnych centraŭ budzie adobrana na samicie.
Rašeńnie ab stvareńni takich kamandnych centraŭ, adznačajuć ekśpierty, źjaŭlajecca kampramisam pamiž pazicyjaj ŭschodniejeŭrapiejskich krain, niekatoryja ź jakich chacieli b bačyć na svajoj terytoryi paŭnavartasnyja vajennyja bazy NATO, i inšymi členami Aljansu, jakija aścierahajucca, što značnaje ŭzmacnieńnie vajennaj prysutnaści la miežaŭ Rasii moža spravakavać Maskvu.
