Metavy aryjencir inflacyi ŭ 2015 hodzie vyznačany na ŭzroŭni 18% z dapuščalnym adchileńniem u 2%, paviedamlaje ŭpraŭleńnie infarmacyi i hramadskich suviaziaŭ Nacyjanalnaha banka pavodle vynikaŭ praviedzienaha 30 studzienia ŭ Minsku pašyranaha pasiadžeńnia praŭleńnia centralnaha banka krainy.
Nahadajem, asnoŭnymi kirunkami hrašova-kredytnaj palityki Biełarusi na 2015 hod pryrost cen byŭ praduhledžany nie bolš jak 12%.
«Asnoŭnaj metaj hrašova-kredytnaj palityki Nacyjanalnaha banka ŭ 2015 hodzie źjaŭlajecca abmiežavańnie inflacyi dla sadziejničańnia ŭstojlivamu i zbałansavanamu raźvićciu ekanomiki. Pavodle vynikaŭ minułaha hoda hety pakazčyk značna pieravysiŭ prahnozny paramietr i skłaŭ 16,2%», — paviedamlaje pres-słužba Nacbanka.
Uzrovień inflacyi ŭ 2015 hodzie, zajaŭlaje rehulatar, budzie dasiahacca šlacham kantrolu nad hrašovaj prapanovaj z boku Nacyjanalnaha banka. Dla hetaha budzie ažyćcioŭleny pierachod da režymu manietarnaha tarhietavańnia. Pry hetym u jakaści pramiežkavaha aryjencira hrašova-kredytnaj palityki vyznačajecca pryrost siaredniaj šyrokaj hrašovaj masy na ŭzroŭni nie bolš jak 30% za 2015 hod. U jakaści apieracyjnaha aryjencira hrašova-kredytnaj palityki vyznačany pryrost siaredniaj rublovaj hrašovaj bazy.
Metavyja paramietry pryrostu siaredniaj rublovaj hrašovaj bazy i siaredniaj šyrokaj hrašovaj masy buduć dasiahacca z vykarystańniem instrumientaŭ hrašova-kredytnaj palityki. Buduć adnoŭlenyja rehularnyja aŭkcyjony na adkrytym rynku, paviedamlaje pres-słužba Nacbanka.
