«My va ŭnikalnym miescy i časie: svaimi ŭłasnymi siłami, choć u adzinočku možna raspaŭsiudzić ideju na ŭvieś śviet i zarablać na joj»,
— miarkuje Juryj Mielničak.
Jaho idejaj była mabilnaja prahrama Maps.me (raniej Maps With Me), što daje mahčymaść karystacca kartami adkrytaha prajektu Open Street Maps, u tym liku u adsutnaść internetu. U kancy 2014 hoda prajekt nabyŭ rasijski internet-hihant Mail.ru, suma uhody aceńvajecca ŭ 30 młn dalaraŭ.
Jak stvaryć paśpiachovy IT-startap u Biełarusi? «Znajści dobruju ideju i realizavać jaje, voś i ŭsio», — prosta adkazvaje na pytańnie Mielničak. Jon ličyć, što asablivych chitrykaŭ u jaho biźniesie niama, a kali i jość, to ŭsie jany apisanyja ŭ knizie suzasnavalnika PayPal Pitara Cila «Zero to one».
Mielničak pryhadvaje, što pa zakančeńni Liceja BDU jon užo raspracavaŭ svaju pieršuju prahramu (jana stvarała krasvordy dla haziet), zatym 7 hod pracavaŭ u kampanii, što była źviazanaja z kartahrafijaj, a paśla pierajšoŭ u Google i tam zajmaŭsia kartami. Ale adna sprava — pracavać na kahości i atrymlivać z taho tolki karysny dośvied, a inšaja — rabić svoj pradukt, stvarać svaju aŭdytoryju.
Pavodle jaho słoŭ, u Biełarusi svaja śpiecyfika IT-biźniesu: tut praktyčna niama ŭnutranaha rynku (dy i ŭ krainie mała ludziej), tamu mnohija pracujuć adrazu na hłabalny rynak.
Kali rabić u Biełarusi niešta z prycełam na pośpiech, treba adrazu rabić heta nie na łakalny rynak.
Tamu i była abranaja tematyka kart — praduktu nišavaj patreby, ale zapatrabavanaha pa ŭsim śviecie. «Taki prajekt nie zaležyć ad palityčnaj situacyi, ad ekanomiki», — tłumačyŭ jon. Da taho ž, varta prychodzić na rynak, kali jon tolki pačynaje raźvivacca, kali na im niama kankurencyi — jak raz takim byŭ rynak mabilnych prahram u 2011 hodzie, kali vyjšła pieršaja viersija Maps.me. Biełaruś jon bačyć zručnaj dla IT-biźniesu — nizkija padatki, dobryja ŭmovy pracy na ekspart, nizki košt žyćcia ŭ paraŭnańni ź Jeŭropaj.
Da taho ž, u Biełarusi byli dobra napoŭnienyja karty Open Street Maps — start adbyŭsia z vyhadnaj pazicyi. Praŭda, na toj ža pazicyi byli jašče niekalki prahram, raspracavanyja taksama biełarusami. Kartahrafičnyja prahramy — nie vielmi kankurentnaje asiarodździe, čałaviek moža pastavić niekalki prahram i paraŭnoŭvać ich jakaść. Dy i ŭ toj čas, kali smartfony tolki pačynali stanavicca masavymi, u karystalnikaŭ było bolš entuzijazmu da pošuku lepšaha softa.
Prajekt rabiŭsia na ŭłasnyja nazapašvańni suzasnavalnikaŭ. Dla stvareńnia Maps.me Mielničak pradaŭ kvateru ŭ Minsku.
Jon pryhadvaje, što prajekt raspracoŭvaŭsia doŭha — i što vielmi ŭdziačny čałavieku, jaki pierakanaŭ ich pachutčej vypuścić prahramu, chaj i «syruju». Karystalniki-entuzijasty sami padkazali, što vypravić i što dadać. Dachodziła da taho, što pa pažadańniach karystalnikaŭ raspracoŭščyki źmienšyli pamier virtualnaj strełki, što pakazvaje łakacyju čałavieka.
Kali stvarać startap siońnia, treba hladzieć, što praz 5 hod budzie tak ža papularna, jak iPhone, rekamienduje Mielničak.
Takimi śfierami jon bačyć razumnyja hadzińniki, dronaŭ robataŭ, analiz Big data i źviestak karystalnika pra samoha siabie. U ich vypadku pierśpiektyŭnaj zdałasia śfiera mabilnych kart, a niša takich kart, jakija pracavali by bieź internetu, była praktyčna vakantnaj.
«Važna iści nie tudy, dzie zaraz miač, a tudy, dzie jon budzie praz 5 hod»,
— kaža jon.
Pavodle jaho nazirańniaŭ, rynak płatnych prahram pamiraje: u top-15 prahram dla iOS pa vyručcy tolki adna płatnaja — najbolš zarablajuć jakraz biaspłatnyja. «Ludziam ciažka płacić za niemateryjalnaje. Płociš za toje, čaho nie bačyš», — kaža jon pra prodaž prahram.
Siońnia dobra možna zarabić na rekłamie, kali jaje ŭstavić arhanična. Naprykład, na kartach najlepšy efiekt budzie mieć mahčymaść zabraniravać miesca ŭ hateli, na jaki hladzić karystalnik, ci zamović taksi da miescaznachodžańnia karystalnika.
I nie zabyvać, što lepiej spracuje prahrama ŭ pravilna abranym siehmiencie, u jakim jana budzie najlepšaj.
«Hałoŭnaje — nie dumać, jak zarabić, a dumać, jak atrymać bolej karystalnikaŭ»,
— raić Mielničak.
Ale dumać, jak płacić zarpłatu najomnym supracoŭnikam, kali-niebudź pryjdziecca. Zasnavalniki Maps.me pačali dumać ab prodažy kampanii, kali zrazumieli — ich madel ź biaspłatnaj bazavaj i płatnaj prasunutaj viersijami pakul prynosić prybytak, ale blizicca jaje zachad. A najlepšym dla karystalnika moža być tolki biaspłatny pradukt, upeŭnienyja jany. Da taho ž, Mielničak ličyć, što startap — heta ŭ lubym vypadku časovaja arhanizacyja dla taho, kab znajści ideju dla biźniesu.
Google i Jandeks, što ŭžo mieli svaje kartahrafičnyja servisy — stvaralniki Maps.me ich nie razhladali, bo «nie chaciełasia pradavać kampaniju pad zaboj».
Ale patrebnaja była hłabalnaja kampanija, jakaja da taho ž nie zakryvała adkrytyja źviestki Maps.me. Być całkam aŭtanomnym prajektam u svaim składzie prapanavali rasijanie Mail.ru, jakija jakraz majuć hłabalny płany ź siervisam My.com.
Takuju prapanovu ŭ Maps.me paličyli aptymalnaj. I ličać, što nie prahandlavalisia niezaležna ad cany: metaj prodažu było paskareńnie raźvićcia, pavieličeńnie bazy karystalnikaŭ. Da taho ž, praca ŭ jakaści padraździaleńnia Mail.ru dała mahčymaść zrabić prahramu całkam biaspłatnaj.
Pakidać prajekt adrazu pa prodažy i stvarać novy prajekt Mielničak pakul nie płanuje, bo «na hetym jašče płany zrealizavanyja adsotkaŭ na 30».
