U Biełarusi pavialičvajucca štrafy za niezakonnyja apieracyi z valutaj. Adpaviedny ŭkaz №49 «Ab zabieśpiačeńni paradku pry ažyćciaŭleńni valutnych apieracyj» kiraŭnik Biełarusi padpisaŭ 9 lutaha.
Dakumient vydadzieny ŭ metach niedapuščeńnia raźvićcia niehatyŭnych tendencyj na valutnym i finansavym rynkach z ulikam uzrosłaha popytu na zamiežnuju valutu, adznačyli ŭ pres-słužbie.
Ukaz praduhledžvaje, u pryvatnaści, pavieličeńnie pamieraŭ administracyjnych štrafaŭ za niezakonnyja skupku, prodaž, abmien zamiežnaj valuty (da 150 bazavych vieličyń, a pry paŭtornym ździajśnieńni — da 200 bazavych vieličyń), za niezakonnaje pryniaćcie zamiežnaj valuty ŭ jakaści płaciežnaha srodku (da 100 bazavych vieličyń, a dla indyvidualnych pradprymalnikaŭ i jurydyčnych asobaŭ — da 200 bazavych vieličyń, pry paŭtornym ździajśnieńni — adpaviedna da 200 i da 300 bazavych vieličyń).
Za ažyćciaŭleńnie valutnaj apieracyi biez atrymańnia ŭ nieabchodnych vypadkach dazvołu Nacyjanalnaha banka praduhledžvajecca pavieličeńnie administracyjnaha štrafu da 100 bazavych vieličyń, a dla indyvidualnych pradprymalnikaŭ i jurydyčnych asobaŭ — da 200 bazavych vieličyń.
Dakumientam praduhledžvajecca ŭviadzieńnie mahčymaści kanfiskacyi nie tolki zamiežnaj valuty, jakaja źjaŭlajecca pradmietam administracyjnaha pravaparušeńnia, ale i ŭsioj zamiežnaj valuty i inšych hrašovych srodkaŭ, jakija znachodzilisia ŭ vinavataj asoby pry sabie na momant ździajśnieńnia pravaparušeńnia.
Ustanoŭlena taksama administracyjnaja adkaznaść za zamach na skupku, prodaž, abmien zamiežnaj valuty, jakija ažyćciaŭlajucca bieź śpiecyjalnaha dazvołu (licenzii) abo dziaržaŭnaj rehistracyi, što dazvolić pryciahvać da adkaznaści asob, naviazvajuć hramadzianam svaje pasłuhi pa praviadzieńni niezakonnych apieracyj z valutaj.
Ukaz ustupaje ŭ siłu paśla jaho aficyjnaha apublikavańnia i dziejničaje da ŭstupleńnia ŭ siłu zakona Respubliki Biełaruś ab uniasieńni adpaviednych dapaŭnieńniaŭ i źmianieńniaŭ u Kodeks Respubliki Biełaruś ab administracyjnych pravaparušeńniach i Pracesualna-vykanaŭčy kodeks Respubliki Biełaruś ab administracyjnych pravaparušeńniach.
