U niadzielu terarysty z tak zvanaj «Isłamskaj dziaržavy» apublikavali videa, jak adrazajuć hałovy 21 jehipieckamu chryścijaninu. Hetyja chryścijanie-kopty byli vykradzienyja ŭ Livii, dzie jany pracavali.
«Isłamskaja dziaržava» dziejničaje ŭ Iraku, Siryi, Livii, Jehipcie i Nihieryi. U pieršych troch z hetych krain joj udałosia zachapić značnyja terytoryi.
Sposab zabojstva tradycyjny dla hetych terarystaŭ. Pałonnych adzieli ŭ aranžavyja kambiniezony, pastavili na kaleni na plažy. Kožnaha chryścijanina trymaŭ teraryst u mascy z nažom. Paśla začytvańnia karotkaj zajavy pravadyra «Isłamskaj dziaržavy» ŭsich zakładnikaŭ čakała śmierć.
Miarkujecca, što videa było źniata ŭ rajonie stalicy Livii, horada Trypali.
Terarysty dali videa nazvu «Padpisanaje kryvioj pasłańnie narodam kryža».
Teraryst na videa paabiacaŭ chryścijanam «za moram» (majecca na ŭvazie Mižziemnaje mora) śmierć abo paniavoleńnie.
Prezident Jehipta pravioŭ terminovuju naradu kiraŭnikoŭ siłavych struktur i paabiacaŭ adpomścić za svaich hramadzian. Musulmanskija aŭtarytety ŭ Kairy nazvali zabojstva «varvarskim aktam, niesumiaščalnym ni ź jakimi relihijami».
Kaalicyja na čale z ZŠA nanosić avijaŭdary pa paziyjach «Isłamskaj dziaržavy» ŭ Siryi i Jehipcie, ale mnohija ekśpierty miarkujuć, što dla źniščeńnia hetaj fanatyčnaj hrupoŭki spatrebicca naziemnaja apieracyja.
