U suviazi z budaŭnictvam treciaj linii Minskaha mietrapalitena pad znos trapiła 140 budynkaŭ i zbudavańniaŭ, u tym liku 38 — žyłych. Ab hetym na pres-kanfierencyi 26 lutaha ŭ Minsku paviedamiŭ načalnik UP «Dyrekcyja pa budaŭnictvie Minskaha mietrapalitena» Pavieł Carun.
«Letaś užo praviedzieny znos častki budynkaŭ i zbudavańniaŭ, jakija traplajuć u zonu trasy mietro. Heta i administracyjnyja budynki, i žyłyja», — skazaŭ Carun.
Pavodle jaho słoŭ, pa administracyjnych budynkach pravodzicca acenka, paśla hetaha ŭładalnikam vypłačvajucca hrašovyja srodki. Što da žyłych damoŭ, to niekatoryja hramadzianie pryniali rašeńnie atrymlivać uzamien znosimaha žylla hrašovuju kampiensacyju zhodna z rynačnaj acenkaj, jakaja składaje — u zaležnaści ad doli vałodańnia — 300-600 młn rubloŭ. Košt usiaho abjekta moža składać kala 1 młrd rubloŭ. Niekatoryja hramadzianie vybrali sposab kampiensacyi ŭ vyhladzie vydzialeńnia novaha žylla ŭ roznych rajonach horada — Kamiennaja Horka, Kastryčnicki, Maskoŭski, Centralny rajony.
«My jak dziaržzakazčyki adstojvajem intaresy dziaržavy ŭ vyhladzie pałažeńniaŭ zakanadaŭstva. I ŭ nas uźnikajuć sudovyja sprečki z uładalnikami damoŭ, jakija ličać, što im niapravilna dajecca kampiensacyja za damy, jakija znosiać, ličać, što płošča vydzielenaha žylla pavinna być bolšaj. Jość u nas spravy, jakija ciahnucca pa paŭtara-dva hady», — skazaŭ Carun. Pavodle jaho słoŭ, niaźniesienymi zastajucca dva damy ŭ rajonie vulicy Žukoŭskaha, adzin — kala budučaj stancyi «Vakzalnaja» i jašče try — u rajonie vulicy Kłary Cetkin.
