Fota Kiryły Chilko.
U lutym ŭ najstarejšaj niezaležnaj haziecie «Biełorusy i rynok» źmianiŭsia hałoŭny redaktar. Viačasłaŭ Chadasoŭski, jaki zasnavaŭ hazietu ŭ 1990-m hodzie, pierajšoŭ na simvaličnuju pasadu šef-redaktara. A na jaho miesca pryjšła Valancina Vieštart.
Źmieny byli vyklikany ekanamičnym kryzisam, ź jakoha vydańnie nie mahło vybracca ŭžo praciahły čas. U vyniku Viačasłaŭ Chadasoŭski pradaŭ častku akcyj haziety pryvatnym asobam. Viadoma, što adzin ź ich — hiendyrektar «Jeŭrapiejskaha radyjo dla Biełarusi» Dźmitryj Novikaŭ, jaki žyvie ŭ Polščy, i jašče niekalki polskich hramadzian.
Zdavałasia b, techničnaje pytańnie. Ale takija źmieny pryviali da supraćstajańnia novaha kiraŭnictva i kalektyvu. I kanflikt vyjšaŭ za miežy redakcyi. Žurnalisty, niekatoryja ź jakich razam pracujuć dva dziesiacihodździ, nie ŭspryniali ludziej nie sa svajho koła. I krytyčna adreahavali na novaŭviadzieńni ŭ padrychtoŭcy tekstaŭ. Zahavaryli pra zvalnieńni.
«…Ad žurnalistaŭ patrabavali inšaj padačy materyjałaŭ i inšaha charaktaru pracy. Havorka išła pra niejkuju inšuju hazietu. Jakuju — niezrazumieła, pakolki jaje kancepcyja pradstaŭlena nie była. I jak u takich umovach vyrašyć dla siabie, ci chaču ja rabić hetuju hazietu, kali nie viedaju, pra što jana?» — zajaviła namieśnica hałoŭreda Iryna Kryłovič.
Hazieta «Biełorusy i rynok» była stvorana ŭ listapadzie 1990 hoda. Da 2005 vychodziła pad nazvaj «Biełorusskij rynok». Vydańnie piša pra palityku, ale hałoŭnaj temaj uvieś čas zastajecca ekanomika. Pazicyja vydańnia ŭsie hetyja hady była vyrazna prarynkavaj i praniezaležnickaj.
Ciapier žurnalisty «BiR» apielujuć da taho, što hazieta za čverć stahodździa stała viadomaj na rynku. Ale nichto nie moža asprečvać, što vydańnie znachodzicca ŭ praciahłym kryzisie. Nakład upaŭ da 6500 asobnikaŭ. Z 32 pałos siońnia zastalisia tolki 16. Internet-viersija vydańnia, miarkujučy pa internet-ličylnikaŭ, maje małuju aŭdytoryju. Ale vydańniu pa-raniejšamu daviarajuć rekłamadaŭcy, i heta patencyjna moža palehčyć jaho restrukturyzacyju.
«Buduć skaračeńni»
«Naša Niva» źviarnułasia da novaj hałoŭnaj redaktarki Valanciny Vieštart, kab jana raskazała pra los haziety. Da prychodu ŭ «BiR» jana była zaŭvažnym žurnalistam u «Nacionalnoj ekonomičieskoj hazietie», była hałoŭnym redaktaram dziaržaŭnaha časopisa «Biełorusskoje sielskoje choziajstvo».
Valancina Vieštart.Fota z sacsietak.
«NN»: Vy miesiac adpracavali na pasadzie hałoŭnaha redaktara. Płan vychadu z ekanamičnaha kryzisu dla haziety ŭžo majecie?
— Tak, prajšoŭ miesiac, ale heta nie mnoha. Ja tolki zmahła praanalizavać finansavy stan pradpryjemstva i namiecić pieršyja kroki pa jaho palapšeńniu. Zrazumieła, płany jość, ale publična ich abmiarkoŭvać my nie budziem. Usio ž taki ZAT «Miedyjarynak» — heta pryvatnaje pradpryjemstva. Da taho ž, zaraz usim niaprosta, i ŚMI ŭ tym liku.
«NN»: Razam z ekanamičnymi pryblemami ŭźnikli i prablemy ŭ kalektyvie. Buduć skaračeńni, novyja pryznačeńni?
— Ja nie viedaju, jakija prablemy vy majecie na ŭvazie. Tak, my dyskutujem. Byvaje i zališnie emacyjna. Mnie padajecca, što heta adbyvajecca z-za taho, što ŭsie niepakojacca pra los vydańnia, ale časta pa-roznamu bačać vyjście z składanych situacyj. Usie tvorčyja asoby… Tym bolš ludziam heta ŭłaściva — bajacca pieramien.
Što da skaračeńniaŭ i pryznačeńniaŭ, to, dumaju, jany buduć chacia by z-za taho, što zaraz štat haziety nieapraŭdana razdźmuty. Pad skaračeńnie trapiać tyja, chto minimalna ŭdzielničaje ŭ redakcyjnych spravach.
Što tyčyć «asnoŭnaha składu», to, zrazumieła, mnie b nie chaciełasia, kab hazietu pakinuli kvalifikavanyja śpiecyjalisty, ekśpierty u svaich halinach. Ja prykładu usie namahańni, kab i źmieny adbylisia, i ludzi zachavalisia.
«NN»: Ci budzie adbyvacca źmiena albo pašyreńnie tematyki haziety? Jak paviedamlajuć supracoŭniki haziety, nibyta prapanujecca admovicca ad palityki.
— Źmieny tematyki nie płanujecca. «Biełorusy i rynok» zastaniecca vydańniem dla dziełavych ludziej. Mnie padajecca, što ŭ dadzienym vypadku łahična kazać pra viartańnie da toj šyryni tematyki, jakaja była ŭ haziety raniej, da pieriechodu na 16-pałosny farmat. Miarkuju taksama, što bolš uvahi my budziem nadavać mikraekanamičnamu uzroŭniu — prablemam i spadziavańniam subjektaŭ haspadarańnia. Budziem dapamahać im šukać adkazy na składanyja ekanamičnyja pytańni siońniašniaha času. Płanuju, što hazieta stanie jašče bolej šmathałosaj, u joj źjavicca jašče bolš kamientaroŭ, dumak, acenak, prahnozaŭ.
Ja vieru ŭ toje, što ŭ niedalokim časie hazieta «Biełarusy i rynak» budzie abaviazkovym atrybutam kožnaha dziełavoha čałavieka.
Što da palityki, to zrazumieła, usie hałoŭnyja palityčnyja padziei znojduć adlustravańnie na staronkach haziety, ale, jak ja ŭžo kazała, jana zastaniecca dziełavym vydańniem. My nie płanujem pieravodzić jaje ŭ stan hramadska-palityčnaj.
U hetym «poli» pracujuć takija mocnyja vydańni, jak, naprykład, vaša hazieta, «Narodnaja vola», «Svobodnyje novosti plus», kali my havorym pra niedziaržaŭnyja haziety. Naŭrad ci tradycyjna dziełavoje vydańnie zmoža «ciahacca» s imi.
«NN»: Što budzie ź internet-viersijaj?
— Interniet-viersiju my budziem raźvivać. Heta nie pieršasnaja zadača, bo jana davoli zatratnaja, ale dumaju, čto ŭ chutkim časie, jak tolki buduć vyrašany asnoŭnyja finansavyja prablemy, jaje my taksama vyrašym. Schiema raźvićcia — kłasičnaja: cikavyja i važnyja naviny, zdabytyja žurnalistami na ciahu tydnia buduć źjaŭlacca na sajcie, a analityka — budzie drukavacca u papiarovaj viersii.
