U siale Charbatava Irkuckaj vobłaści RF ź biblijateki prybrali niekalki viadomych dziciačych knih na asnovie zakona ab abaronie dziaciej ad infarmacyi, što nanosić škodu ich zdaroŭju i raźvićciu.
kadr z multfilma «Dziujmovačka»
Śpis kazak, jakija ŭ siale całkam zabaranili dla raspaŭsiudžvańnia siarod dziaciej usich uzrostaŭ, savietnik prezidenta Uładzimir Tałstoj ahučyŭ u Dziarždumie na kruhłym stale na temu roli litaratury ŭ patryjatyčnym vychavańni.
U dakumiencie, stvoranym u rajonnym adździele narodnaj adukacyi Irkuckaj vobłaści, havorycca, što «Karłsan, jaki žyvie na dachu» admaŭlaje siamiejnyja kaštoŭnaści i farmuje niepavahu da baćkoŭ. Kniha «Pryhody Toma Sojera i Hieklbiery Fina», na dumku orhanaŭ adukacyi, moža zaachvocić dziaciej zajmacca badziažnictvam.
Pretenzii ŭ miascovych čynoŭnikaŭ taksama vyklikali kazki dla samych maleńkich. Naprykład, u kazcy «Ivan Carevič i Šery voŭk» prysutničajuć sceny kradziažu — tam vykrali kania i Alenu Pryhožuju. U «Kałabku» znajšli sceny fizičnaha hvałtu, a ŭ «Dziujmovačcy» — fakty prymusu da ŭstupleńnia ŭ šlub.
Paznačyŭšy pretenzii rajonnaha adździeła narodnaj adukacyi da hetych knih, Tałstoj adznačyŭ, što dzieciam zabaraniajuć čytać kazki, na jakich vyraśli ich baćki, babuli i dziaduli. Prezident Rasijskaha knižnaha sajuza Siarhiej Ściapašyn ŭ suviazi z hetym prapanavaŭ zakanadaŭcam bolš uvažliva stavicca da svajoj dziejnaści i dumać pry pryniaćci zakonaŭ.