Kiraŭnička ŭkrainskaha ŭradu naviedałasia z dvuchdzionnym vizytam u Brusel. U časie pieršaha vizytu za miažu ŭ jakaści premjer-ministra jana inicyjavała pierahlad damovy z Rasiejaj ab pastaŭkach hazu va Ŭkrainu i prapanavała pabudovu hazapravodu z Turkmienistanu ŭ Eŭropu praz Ukrainu.
U paniadziełak Julija Cimašenka sustrełasia z prezydentam Eŭrakamisii Žaze Manuelem Barozu, kamisaram pa pytańniach enerhietyki Andrysam Pibałhsam i kaardynataram ES pa pytańniach raźvićcia paŭdniovych prajektaŭ hazapravodaŭ Jozisam Johanesam van Aartsenam.
U aŭtorak Ju.Cimašenka sustrakałasia ź viarchoŭnym pradstaŭnikom Eŭrasajuzu pa zamiežnaj palitycy i biaśpiecy Chaŭjeram Salanam.
Julija Cimašenka prapanavała Eŭrasajuzu partnerstva ŭ realizacyi prajekta «Biełaja płyń» («White Stream») pa pastaŭkach hazu ŭ Eŭropu praz terytoryju Ŭkrainy. Na dumku kiraŭnički ŭkrainskaha ŭradu, heta daje mahčymaść dyversyfikacyi pastavak hazu ŭ krainy ES. Jana nahadała, što raniej była stvoranaja donarskaja hrupa, što pavinna dapamahčy akumulavać srodki, nieabchodnyja dla madernizacyi i refarmavańnia systemy pastavak rasiejskaha hazu ŭ Eŭropu praz terytoryju Ukrainy. Ideja stvareńnia «White Stream» źjaviłasia ŭ 2005 h. i zaklučajecca ŭ pabudovie hazapravodu z Turkmenistanu praz Azerbajdžan u hruzinski port Supsa, i zatym pa dnie Čornaha mora praz Krym u nakirunku Eŭrasajuzu.
Paśla sustrečy ź Cimašenkaj kamisar pa pytańniach zamiežnaj palityki i eŭrapiejskaj palityki dobrasusiedztva Benita Ferera-Valdner zajaviła pra namier namierien naviedać Kijeŭ 14 lutaha ŭ ramkach mižnarodnaj kanferencyi na ŭzroŭni ministraŭ zamiežnych spraŭ krainaŭ-čalcoŭ ES i krainaŭ Čarnamorskaha rehijonu Black sea energy.
29 studzienia ŭkrainskaja internet-hazeta korrespondent.net sa spasyłkaj na infarmacyjnaje ahienctva Bloomberg pracytavała słovy Cimašenki ab padtrymcy Eŭrasajuzam jaje prapanovaŭ pra pierahlad damovy z Rasiejaj ab pastaŭkach hazu va Ŭkrainu i Eŭropu. «Ja pačuła padtrymku takoha typu pieramovaŭ tut siońnia. ES zacikaŭleny ŭ farmavańni doŭhaterminovaj cenavaj palityki» – zajaviła Ju. Cimašenka pa vynikach vizytu ŭ Eŭraparlament. Pavodle vydańnia, Cimašenka choča taksama padvysić taryfy na tranzyt rasiejskaha hazu i taryfy na zachoŭvańnie hazu va ŭkrainskich padziemnych hazaschoviščach, i pazbavicca ad hazatrejdera RosUkrEnergo. Kiraŭnička ŭradu zajaviła, što budzie havaryć pra heta ŭ časie svajho chutkaha vizytu ŭ Maskvu. Jana padkreśliła, što «pavinna być rynačnaja, a nie palityčnaja dyskusija».
Inicyjatyvy premjer-ministra Ŭkrainy piarečać raniejšym zajavam prezydenta krainy Viktara Juščanki nakont taho, što pavyšeńnie taryfaŭ na transparciroŭku rasiejskaha hazu praz terytoryju Ŭkrainy moža naškodzić.
Apanenty Cimašenki skieptyčna vykazvajucca pra ažyćciaŭleńnie prajektu “Biełaja płyń”. Tak, były ministar paliva i enerhietyki Jury Bojka, deputat Viarchoŭnaj Rady ad Partyi rehijonaŭ ličyć, što na dadzieny momant palityčnaja vaha ES užo skiravanaja na padtrymku kankurujučaha prajektu Nabucco.
Nabucco zaprajektavany, jak mahistralny hazapravod praciahłaściu 3,3 tys. km u abychod Rasiei z Centralnaj Azii ŭ krainy ES, najpierš u Aŭstryju i Niamieččynu. Zaplanavanaja mahutnaść — 26-32 młrd kubametraŭ hazu ŭ hod. Pabudovu planujecca skončyć da 2012 hodu.
