Kamanda Paderborn Baskets atrymała techničnuju parazu ad Chemnitz Niners, u vyniku čaho vylecieła ŭ nižejšuju lihu ProB, raspaviadaje Der Spiegel.
Pryčynaj vyletu stała zatrymka pačatku hulni na 25 chvilin.
Hulniu nie zdoleli pačać svoječasova praź niefunkcyjanalnaje tabło: na kampjutary, što kantralavaŭ tabło, išło «samavolnaje» abnaŭleńnie Windows.
Techničny supracoŭnik Paderborn Baskets za paŭtary hadziny da pryznačanaha času hulni paklučyŭ noŭtbuk da tabło. Pakul kamandy rychtavalisia da hulni, noŭtbuk zavisnuŭ. Jaho pryjšłosia pierazahruzić, ale pa pierazahruzcy apieracyjnaja sistema pačała ŭstaloŭvać abnaŭleńni.
Hulniu atrymałasia pačać tolki ŭ 19:55, na 25 chvilin paźniej za pryznačany čas Paderborn Baskets pieramahli ź likam 69:62. Ale Chemnitz Niners zajavili, što haspadary musiać być pakaranyja za zatrymku hulni — pavodle niamieckich pravił, matč treba pačynać nie paźniej za 15 chvilin paśla pryznačanaha času.
«Abnoŭlenaj» kamandzie zaličyli techničnuju parazu. Papiarednija nie samyja lepšyja hulni trymali jaje na miažy vyletu ŭ nižejšuju lihu — techničnaja paraza stała fatalnaj. Mieniedžar Paderborn Baskets zajaviŭ, što situacyja nie maje ničoha ahulnaha sa sportam i źbirajecca padać apielacyju.
