Biełaruski prajekt Pet2You jość pieršaj paŭnavartasnaj sacsietkaj dla žyvioł i ich haspadaroŭ, raspaviadaje TUT.BY.
Pakul Pet2You raźličanaja tolki na ŭładalnikaŭ katoŭ i sabak, ale ź ciaham času zarehistravacca zmohuć i ŭładalniki inšych žyvioł.
Prajekt nahadvaje zvyčajnyja sacsietki dla ludziej — rehistrujucca ŭ joj, jak ni dziva, nie žyvioły, a ich haspadary.
U sacsietcy jany zmohuć znajści adnadumcaŭ i siabroŭ, raspavieści pra svaich hadavancaŭ, adšukać adkazy na važnyja pytańni ŭ encykłapiedyi, raźličyć racyjon žyvioły, a taksama prasačyć za žyviołaj na mapie z dapamohaj trekieru u siervisie PetXNet.
Trekier dla adsočki žyvioły buduć prapanoŭvać pa canie kala miljona rubloŭ. Taksama siarod płatnych funkcyj sacsietki abviestki ab prodažy žyvioł ci pošuku partnioraŭ dla žyvioły.
Druhaja novaja biełaruskaja sacsietka — prajekt byłoha futbalista Jurasia Jurčanki «Kraina maraŭ». Pra jaje raspaviadaje «Radyjo Svaboda».
«Kraina maraŭ» — biełaruskamoŭnaja sacsietka dla paśpiachovych ludziej. U joj kožny čałaviek moža pastavić sabie metu i dzialicca pośpiechami na šlachu da jaje.
Taksama pry rehistracyi možna paznačyć uzrovień vałodańnia movaj.
Jurčanka raspracoŭvaje sacsietku samastojna i biez sponsaraŭ.
***
Peŭny čas Biełaruś zastavałasia praktyčna biez ułasnych sacsietak: u listapadzie 2014 hoda zakryłasia Vseti.by, 20 krasavika TUT.BY vydalić usie ślady ŭłasnaj sacsietki «Ja tut».
Samaj papularnaj sacsietkaj Biełarusi jość rasijskaja «UKantakcie», bahata biełarusaŭ zarehistravanyja na amierykanskich Facebook, Twitter, Instagram dy rasijskaj «Adnakłaśniki». Mahčyma, dźvie traciny biełaruskich internaŭtaŭ zarehistravanyja na Google+, ale sami pra toje nie zdahadvajucca.
