Dvoje žycharoŭ Babrujska abvinavačvajucca ŭ sieryjnych kradziažach budaŭničaha instrumienta, paviedamiła namieśnik načalnika adździeła pa rasśledavańni złačynstvaŭ suprać ułasnaści ŭpraŭleńnia Śledčaha kamiteta pa Mahiloŭskaj vobłaści Žanna Barysienka.
«Śledstvam ustanoŭlena, što 42-hadovy žychar Babrujska, raniej nieadnarazova sudzimy, na praciahu 2013-2014 hadoŭ ździajśniaŭ kradziažy budaŭničaha instrumienta jak u adzinočku, tak i razam sa zmoŭščykam, raniej nie sudzimym babrujčaninam», — paviedamiła jana.
Dniom padazravany na rovary abjazdžaŭ bližejšyja pryvatnyja novabudoŭli, pryhladaŭsia, časam navat zavodziŭ razmovy z budaŭnikami, kazaŭ, što nibyta zabłudziŭsia, i pytaŭsia pravilnuju darohu. Pakul jamu davali ŭkazańni, mužčyna prykmiačaŭ, jaki instrumient vykarystoŭvajuć na budplacoŭcy.
Paśla dzionnaha rejdu jon vybiraŭ abjekt dla kradziažu i viartaŭsia tudy na rovary nočču. Padazravany pranikaŭ u pamiaškańnie pa budaŭničych lasach praz dach, šlacham adciskańnia dźviery abo vakna albo praź dzirku, jakuju prałomvaŭ u draŭlanaj ścianie. Adzin raz jon navat skarystaŭsia dźviarnym łazam dla sabak. Budaŭničyja instrumienty dla vykradańnia vybiralisia prydzirliva — tolki novyja i darahija. Pieravaha addavałasia bienzahienierataram, zvaračnym aparatam, vuhlešlifavalnym mašynkam, elektrarubankam, drylam. Pracavaŭ mužčyna ŭ palčatkach. Vyvieźci narabavanaje na rovary było niemahčyma, tamu pieryjadyčna padazravany pryciahvaŭ svajho znajomaha z aŭtamabilem, jakomu kazaŭ, kudy pryjechać i dzie jaho čakać.
Pahruziŭšy skradzienaje, zmoŭščyki advozili jaho dadomu, a na nastupnuju ranicu pradavali na «ptušynym rynku». Pakupnikam adzin ź ich padrabiazna raspaviadaŭ pra techničnyja charaktarystyki pradavanych budaŭničych instrumientaŭ, jakija napiaredadni vyvučyŭ ŭ internecie. Canu na vykradzienaje jon taksama trymaŭ dosyć vysokuju, i ŭ spažyŭcoŭ nie ŭźnikała asablivych pytańniaŭ ab pachodžańni tavaru. Adsutnaść supravadžalnaj dakumientacyi jon tłumačyŭ tym, što zhubiŭ jaje.
Usiaho zmoŭščyki ździejśnili 29 kradziažoŭ na ahulnuju sumu bolš za Br200 młn. Paśla zatrymańnia jany pryznali svaju vinu i dali padrabiaznyja pakazańni. Ich dziejańni kvalifikavanyja pa č.3 art.205 KK Biełarusi (kradziež, učynieny ŭ bujnym pamiery).
