 |
31 studzienia skončyła pracu ŭ Biełarusi misija Departamenta hrašova‑kredytnych systemaŭ i rynkaŭ kapitału Mižnarodnaha valutnaha fondu (MVF). Misija dapamahała ŭ raspracoŭcy stratehii kiravańnia źniešniaj pazykaj krainy. Nacyjanalnamu banku i Ministerstvu finansaŭ Biełarusi byli pradstaŭlenyja adpaviedny rekamendacyi. Varta adznačyć, što ad 1995 h. Biełaruś nie atrymlivaje ad MVF kredytaŭ. Pryčyna — ekanamičnaja palityka ŭradu nie adpaviadaje rekamendacyjam fondu. Da 1995 h. Biełaruś atrymała dva kredyty pavodle prahramy systemnych transfarmacyjaŭ i kredyt stand‑by na ahulnuju sumu $269,7 młn.
Źniešnija abaviazalnictvy ekanomiki Biełarusi ŭ trecim kvartale 2007 h. uzraśli na 4,4% da $9,676 młrd pa stanie na 1 kastryčnika, što składaje 22,7% da VUP. U absalutnym vyražeńni źniešniaja pazyka Biełarusi pa vynikach treciaha kvartału pavialičyłasia na $404,5 młn, a pa vynikach troch kvartałaŭ 2007 h. — na $2,936 młrd.
Tym časam, Eŭrapiejski bank rekanstrukcyi i raźvićcia prahnazuje zamarudžvańnie tempaŭ ekanamičnaha rostu ŭ Biełarusi da 6,5‑7% i rost inflacyi da 13%. Urad Biełarusi ŭ biahučym hodzie planuje pavialičyć VUP na 11%, inflacyju miarkujecca ŭtrymlivać u miežach 6‑8%. U 2007 h. VUP Biełarusi pavialičyŭsia na 8,2%, inflacyja skłała 12,1%.
Razam z tym, viadučy ekanamist EBRR Alaksandar Plachanaŭ adznačyŭ, što ŭ cełym biełaruskaja ekanomika vytrymała enerhietyčny šok na pačatku minułaha hodu. Adnak niečakanym staŭsia rost inflacyi naprykancy hodu. Na jaho dumku, tendencyja hetaja zachavajecca ciaham biahučaha hodu.
Akramia taho, ekspert adznačyŭ padaražańnie cany źniešnich pazykaŭ, što moža nehatyŭna adhuknucca na tempach ekanamičnaha rostu krainy.
