Inicyjatyŭnym biełarusam, jakija stvarajuć ułasnyja startapy, pakul nie chapaje dośviedu pa prasoŭvańni svaich raspracovak, zajaviŭ ministr adukacyi Michaił Žuraŭkoŭ 14 krasavika na adkryćci minskaha etapu Mižnarodnaha ŭsierasijskaha startap-tura ŭ Nacyjanalnaj biblijatecy Biełarusi.
Pavodle jaho słoŭ, siońnia ŭ sistemie biełaruskaj adukacyi pracujuć niekalki startap-centraŭ, technaparki, a na šmatlikich inavacyjnych pradpryjemstvach aktyŭna pracujuć studenty. «My pravodzim dastatkovuju kolkaść kursaŭ, sieminaraŭ, jakija pryśviečanyja startapaŭskamu ruchu, my aktyŭna pracujem z Parkam vysokich technałohij… U nas jość cikavyja prajekty, my pravodzim ułasnyja konkursy, i što raduje, univiersitety znachodziać finansavańnie prajektaŭ u pradstaŭnikoŭ biźniesu», — adznačyŭ čynoŭnik.
Adnak pakul u Biełarusi «krychu nie chapaje ahresiŭnaha dośviedu ŭ prasoŭvańni svaich raspracovak» unutry krainy, ličyć Žuraŭkoŭ. Adsutnaść padobnaha dośviedu pryvodzić da taho, što «mnohija studenty hatovyja pierajechać u Rasiju, kali ich tolki zaŭvažać u «Skołkava». «Dla nas heta nie vielmi dobra. My b chacieli, kab u «Skołkava» adčuli, što možna stvaryć dobryja pradpryjemstvy tut [u Biełarusi], što možna pakinuć tut finansy, jakija pasłužać uzajemnamu raźvićciu», — skazaŭ ministr.
U svaju čarhu vice-prezident pa źniešnich kamunikacyjach i rekłamie fondu «Skołkava» Alaksandr Čarnoŭ zapeŭniŭ Žuraŭkova, što fond budzie vielmi rady, kali «biełaruskija startapy pa maksimumie vykarystajuć hrošy, mahčymaści, kantakty» i buduć raźvivacca ŭ Biełarusi.
Ministr adukacyi taksama padkreśliŭ, što praviadzieńnie ŭ Biełarusi adnaho z etapaŭ startap-tura źjaŭlajecca «vielmi važnym i znakavym mierapryjemstvam dla sistemy adukacyi», pakolki «adukacyja biez navuki, navukova-techničnaj i inavacyjnaj dziejnaści siońnia niemahčymaja».
«Vielmi dobra, što nie tolki studenty, ale i školniki starejšych kłasaŭ ciapier vielmi cikaviacca kamiercyjalizacyjaj svaich navukovych daśledavańniaŭ. U hetym ničoha drennaha niama — jany chočuć być razumnymi, raspracoŭvać štości i atrymlivać za heta hodnuju ŭznaharodu ŭ lubym vyhladzie», — skazaŭ Žuraŭkoŭ.
Usierasijski startap-tur źjaŭlajecca maštabnym prajektam, jaki skiravany na pošuk pierśpiektyŭnych inavacyjnych prajektaŭ i akazańnie dapamohi maładym raspracoŭščykam u śfiery vysokich technałohij, jakija žadajuć raźvivacca. Sioleta jon nabyŭ status mižnarodnaha, pakolki mierapryjemstvy prachodziać nie tolki ŭ Rasii, ale i ŭ sumiežnych krainach — Biełarusi i Kazachstanie.
Forum arhanizavany fondam «Skołkava» pry sadziejańni Fiederalnaha ahienctva pa spravach moładzi, Fondu spryjańnia raźvićciu małych form pradpryjemstvaŭ u navukova-techničnaj śfiery, dziaržkarparacyi «Rasnana» i inšych viedamstvaŭ i abjadnańniaŭ. Arhanizataram minskaha etapu hetaha prajekta, jaki prachodzić 14—15 krasavika ŭ Nacyjanalnaj biblijatecy Biełarusi, vystupiŭ Dziaržkamitet pa navucy i technałohijach pry padtrymcy Minskaha haradskoha technaparka.
