 |
Pavodle apytańnia polskaha ahienctva ARC Rynek i Opinia, 65 % palakaŭ ličać, što ich zarobak musić vyraści na 500 złotych ($200) ad ciapierašniaha siaredniaha pakazčyka, ekvivalentnaha 1070 dalaram. A 44 % respandentaŭ užo čakajuć na chutkaje padvyšeńnie zarobkaŭ. Jak vynikaje z daśledvańnia, zładžanaha na zamovu hazety «Polska», 75 % palakaŭ miarkujuć, što pavyšeńnie zarobku musić adbycca ŭžo ciapier, bo nia hledziačy na spryjalnyja ekanamičnyja ŭmovy ŭ krainie, ažno try čverci apytanych nie adčuvajuć hetaha va ŭłasnych kišeniach. Kala 65 % palakaŭ čakajuć pavyšeńnia zarobku na 500 złotych, 22 % raźličvajuć na padvyšku da 1000 złotych. I tolki kožny dziasiaty zadavoleny svaim zarobkam. Što budzie, kali čakańni palakaŭ nakont bolšaha zarobku nia spraŭdziacca? Apytańnie śviedčyć, što 40 % respandentaŭ hatovyja pazmahacca za prybaŭku i abiacajuć strajk.
Nahadajem, što pačatak biahučaha hodu adznačyŭsia ŭ Polščy šeraham strajkaŭ. U studzieni kala 12 tysiač polskich nastaŭnikaŭ vyjšli na vulicy Varšavy z patrabavańniem pavyšeńnia zarobku. Dla nastaŭnikaŭ-pačatkoŭcaŭ adukacyjny prafsajuz patrabavaŭ pavyšeńnia zarobku na 600 złotych, a dla stałych vykładčykaŭ — na 1100 złotych. Ministerstva adukacyi prapanavała ŭ čatyry razy mienš. Nastaŭniki ŭ adkaz paabiacali raspačać u traŭni biesterminovy ahulnanacyjanalny strajk. Adnačasova z nastaŭnikami pratestavali polskija medyki. Siaredni zarobak medykaŭ z ulikam apłaty dziažurstvaŭ u bolšaści balnicaŭ Polščy składaje bolš za 10 000 złotych. Adnak polskija lekary patrabujuć dalejšaha rostu zarobku i skaračeńnia pracoŭnaha času zhodna zakanadaŭstva ES.
Naprykancy studzienia naładziła strajk i polskaja mytnia. Dabivajučysia pavyšeńnia apłaty pracy i źmienaŭ u zakanadaŭstvie, mytniki zablakavali ruch hruzavoha transpartu na ŭschodniaj miažy krainy. U siarednim polski mytnik zarablaje mienš za nastaŭnika, medyka, ci palicyjanta. Jaho zarobak składaje kala 1200 złotych. Strajkoŭcy patrabavali pavyšeńnia na 1500 złotych, urad abiacaŭ im 500.
Siaredni zarobak u Polščy składaje na siońnia kala 1070 dalaraŭ.
