Amierykanski mižpłanietny zond «Miesiendžar» ździejśniŭ zapłanavanaje krušeńnie na pavierchni Mierkuryja, dasłaŭšy apošniaje fota pavierchni płaniety, paviedamlaje NASA.
Fotazdymak 93-kiłamietrovaha u dyjamietry kratara Jokai byŭ zrobleny ŭ apošnija siekundy pierad krušeńniem. Jaho maštab składaje kala adnaho kiłamietra pry pašyreńni prykładna ŭ 2 mietry na pikseł.
Zatym «Miesiendžar» urezaŭsia ŭ pavierchniu Mierkuryja na chutkaści 3,9 kiłamietra ŭ siekundu. Udar byŭ nastolki mocny, što na płaniecie ŭtvaryŭsia novy kratar dyjamietram bolš za 15 mietraŭ. U momant krušeńnia zond znachodziŭsia na «soniečnym baku» Mierkuryja, tamu za pracesam nielha było sačyć ź Ziamli.
Misija «Miesiendžara» pačałasia jašče ŭ 2004 hodzie, adnak aparatu spatrebiłasia bolš za šeść hadoŭ na šlach da arbity najbližejšaj da Sonca płaniety. Aparatu «Novyja haryzonty», jaki nabližaŭsia, da Płutona, spatrebiłasia na try hady bolš, pry hetym jamu nie treba vychodzić na arbitu karlikavaj płaniety.
Navukoŭcy NASA płanavali, što «Miesiendžar» prapracuje kala hoda, adnak, dziakujučy paśpiachovym pakazčykam misii, hety termin pieravysiŭ čatyry hady. Za pieršy hod navukoŭcy skłali kartu ŭsioj pavierchni płaniety na asnovie 88 tysiač vyjaŭ, a taksama atrymali dadzienyja ab źjaŭleńni vysokaenierhietyčnych niejtronaŭ pry ŭspyškach na Soncy.
