Da 2030 hoda ŭ harady-spadarožniki mohuć pierasialicca 104,5 tysiač minčukoŭ. Takuju ličbu ahučyli śpiecyjalisty UP «BiełNDIPhoradabudaŭnictva» siońnia na pasiadžeńni architekturna-horadabudaŭničaha Savieta pry hałoŭnym architektary Minska, dzie padvodzilisia vyniki hramadskaha abmierkavańnia hienieralnych płanaŭ haradoŭ-spadarožnikaŭ stalicy.
Samaje značnaje pavieličeńnie kolkaści nasielnictva za košt pierasialeńnia žycharoŭ stalicy čakajecca ŭ Rudziensku. Pavodle raźlikaŭ, da 2030 hoda jaho nasielnictva pavinna pavialičycca ŭ siem razoŭ z 11,5 tys. da 81 tys. čałaviek. U jakaści patencyjalnych žycharoŭ Rudzienska i jaho navakolla razhladajucca 67 tys. minčukoŭ.
Kolkaść nasielnictva Dziaržynska pavinna pavialičycca z 26,3 tys. da 41 tys. čałaviek, siudy prapanujecca pierasialić 12 tys. minčukoŭ. Jašče 10 tys. žycharoŭ stalicy prapanujuć pierajechać u Smalavičy, dzie da 2030 hoda buduć žyć 30 tys. čałaviek (ciapier — 15,6 tys.). U Zasłaŭje i Fanipal prapanujecca pierasialić ź Minska 6,5 tys. i 6 tys. čałaviek adpaviedna. Takim čynam, u kožnym z hetych haradoŭ buduć žyć pa 23 tys. čałaviek (ciapier u Zasłaŭi — 14,7 tys., Fanipali — 13,8 tys.). Nasielnictva Łahojska pavialičycca z 12 tys. da 16 tys., tut čakajuć 3 tys. minčukoŭ.
U kožnym z hienpłanaŭ vyznačany pierśpiektyŭnyja terytoryi z dobraj infrastrukturaj dla budaŭnictva žylla dla minčukoŭ.
Harady-spadarožniki buduć mieć svaju śpiecyjalizacyju, u adpaviednaści ź jakoj raspracoŭvalisia ich hienpłany. Naprykład, Łahojsk i Zasłaŭje stanuć turyscka-rekreacyjnymi centrami, u Rudziensku, Fanipali i Dziaržynsku vialiki patencyjał dla raźvićcia pramysłovych zon, Smalavičy buduć raźvivacca razam z Kitajska-biełaruskim industryjalnym parkam «Vialiki kamień». Što datyčycca pieranosu pramysłovych pradpryjemstvaŭ ź Minska ŭ harady-spadarožniki, to heta pytańnie jašče prapracoŭvajecca.
