Na adchonach uzdoŭž Minskaj kalcavoj aŭtadarohi vosieńniu buduć vysadžanyja hornaja chvoja, dziavočy vinahrad, kazacki jadłoviec i barbarys Tunbierha, paviedamiŭ na pres-kanfierencyi 3 červienia staršynia Minskaha haradskoha kamiteta pryrodnych resursaŭ i achovy navakolnaha asiarodździa Siarhiej Maślak.
Heta dazvolić «maksimalna zapoŭnić adchony, stvaryć peŭnuju pryhažość i ŭ toj ža čas źnizić zatraty na ich absłuhoŭvańnie». «Biudžetam praduhledžvajucca srodki na ŭtrymańnie, i kali kosicca roŭny hazon — heta adny rascenki, kali kosicca kruty adchon — heta inšyja rascenki, adpaviedna rastuć i zatraty paliva», — rastłumačyŭ Maślak.
Zaraz, dadaŭ jon, čakajecca zaklučeńnie śpiecyjalizavanych arhanizacyj ab tym, jakija raśliny lepš vysadžvać na krutym adchonie ź cieniavoha i soniečnaha boku.
Kiraŭnik kamiteta padkreśliŭ, što raśliny buduć vysadžvać na pustych adchonach.
«Kab pierarabić uvieś adchon, treba źniać ź jaho hazon i ŭsio zrabić pa-novamu, tamu, ja dumaju, što sfarmiravanyja adchony my kranać nie budziem, pustyja — tak, peŭnaja prahrama ŭ hetym kirunku «Minskzielenbudam» užo viadziecca», — dadaŭ jon.
Nahadajem, pra nieabchodnaść vysadžvać uzdoŭž daroh lesapałosy 26 krasavika zajaviŭ Alaksandr Łukašenka. «Na ŭsie vysokija adchony treba pasadzić chvoju, i niachaj jana raście ŭzdoŭž darohi. Heta ŭsio roŭna ekanomija. Nie treba dahladać hetuju pałasu. A tak burjan raście — dva razy na hod chočaš nie chočaš jaho treba kasić», — skazaŭ jon, nahadaŭšy, što raniej takija lesapałosy vysadžvalisia ŭzdoŭž aŭtadaroh, ale potym niekatoryja ź ich vysiakalisia.
