Sud Leninskaha rajona Bresta (cudździa Dźmitryj Šuryn) 3 červienia aštrafavaŭ niezaležnuju žurnalistku Alinu Litvinčuk ahułam na 60 bazavych vieličyń za padvojnaje parušeńnie art. 22.9 č.2 KaAP.
U sudzie razhladalisia adrazu dźvie administracyjnyja spravy ŭ dačynieńni da žurnalistki.
Padstavaj dla pieršaj spravy stała intervju, jakoje 28 sakavika 2015 h. Alina Litvinčuk uziała ŭ pradprymalnicy Śviatłany Pašaluk na dabračynnym kirmašy. (Materyjał «Vielikodny dabračynny kirmaš u Bieraści».) Toje, što žurnalistka nie mieła akredytacyi ŭ jakaści žurnalista na terytoryi Respubliki Biełaruś i «raźmiaściła» intervju «na sajcie polskaj radyjostancyi «Biełaruskaje Radyjo Racyja»», sudździa paličyŭ «niezakonnym vyrabam pradukcyi ŚMI».
Druhuju spravu zaviali z nahody intervju, jakoje žurnalistka ŭziała 3 krasavika ŭ nastaŭnicy «Centra dadatkovaj adukacyi dziaciej i moładzi» Aleny Kachovič. (Materyjał «Hulnia «Birža idej» u Bieraści budzie praciahvacca da traŭnia».)
U sudzie fihuravali razdrukoŭki abodvuch zhadanych materyjałaŭ z sajta «Biełaruskaha Radyjo Racyja». Taksama ŭ sud u jakaści śviedak vyklikali abiedźviuch žančyn-surazmoŭcaŭ žurnalistki. Jany paviedamili, što mieli hutarki z supracoŭnikami KDB ŭ spravie ich kantaktaŭ ź Litvinčuk. U svajoj pastanovie sudździa Šuryn taksama abapirajecca na «infarmacyju načalnika UKDB pa Breskaj vobłaści».
«Abstavin, jakija b źmiakčali adkaznaść Litvinčuk A. S., nie ŭstanoŭlena. Abstavinaj, jakaja abciažarvaje adkaznaść Litvinčuk A.S., sud ličyć ździajśnieńnie administracyjnaha pravaparušeńnia paŭtorna», – havorycca ŭ pastanovie suda.
Infarmacyja pra sud pryjšła Alinie Litvinčuk praz SMS-paviedamleńnie, ale žurnalistka vyrašyła naviedać sudovaje pasiadžeńnie. Razhlad doŭžyŭsia z 10-j ranicy da 16.30. Paśla ahučvańnia rašeńnia žurnalistka padała zajavu, u jakoj adznačyła, što ličyć rašeńnie palityčna matyvavanym i nie adpaviednym nacyjanalnamu i mižnarodnamu zakanadaŭstvu.
Sioleta sudy ŭžo 17 razoŭ štrafavali žurnalistaŭ pavodle art. 22.9 č.2 KaAP, u tym liku 4 razy — Alinu Litvinčuk.
