Napiaredadni vizitu ŭ Škłoŭ Alaksandra Łukašenki miascovaja milicyja pieraśleduje apazicyju, śćviardžaje eks-kandydat u prezidenty, namieśnik staršyni Partyi BNF, žychar rajcentra Ryhor Kastusioŭ.
«U kvateru prychodziŭ milicyjanier, skazaŭ, kab u bližejšuju subotu da abiedu nie adkryvali vokny, a potym spytaŭ, dzie ja znachodžusia, tamu što jaho prasili ŭdakładnić», — paviedamiŭ apazicyjny palityk. Pavodle jaho słoŭ, ciapier jon znachodzicca ŭ svajoj vioscy niedaloka ad rajonnaha centra.
«Ja razhladaju takuju zacikaŭlenaść napiaredadni pryjezdu Łukašenki jak palityčny pieraśled. Bo samo pytańnie ŭžo hučyć niepryjemna. Pytajucca ŭ rodnych, blizkich, kab pakazać — hladzicie, my za vami sočym. Heta palityčny pieraśled, namiok na niejkija mahčymyja dziejańni», — ličyć Kastusioŭ.
Pavodle słoŭ apazicyjnaha palityka, adna z metaŭ vizitu Łukašenki — naviedvańnie škłoŭskaha daŭhabuda, Ladovaha pałaca. «Jaho pavinny byli zakončyć hady try tamu, ale nijak nie dabudujuć. Navat moładź u Škłovie źbirała podpisy, kab adbudavali hety Ladovy pałac, adpraŭlali ŭ Administracyju prezidenta, pałac pačynali dabudoŭvać, potym znoŭ zakidvali. Kažuć, nie chapaje hrošaj, pry tym što kožny hod my čytajem, što ŭ Škłovie vykryvajucca fakty karupcyi na sotni tysiač dołaraŭ», — skazaŭ namieśnik staršyni Partyi BNF.
