Daśledavańnie hłabalnaj nahruzki chvarob čałaviectva (PDF) z 1990 pa 2013 hady vyjaviła, što tolki kožny dvaccaty čałaviek u śviecie moža być pryznany zdarovym pa sučasnych kryteryjach.
Ludzi musiać pieraklučycca z prostaha padtrymańnia žyćcia da staraści da padtrymańnia zdarovaha žyćcia, ličać daśledčyki. Čałaviectva nadaje niedastatkova ŭvahi parušeńniam pracy aporna-ruchalnaha aparatu i psichičnym rasstrojstvam, miarkujuć jany.
Pavodle daśledavańnia, tolki 5% ludziej možna pryznać zdarovymi. Kožny treci na Ziamli cierpić ad piaci i bolš chvarob adnačasova. Imaviernaść śmierci va ŭzroście 15-50 hod vahajecca ad 1,2% dla žančyn u Andory da 52% dla mužčyn ź Lesota.
Situacyja z chvarobami paharšajecca jak praz stareńnie nasielnictva, tak i praz rost kolkaści chvarob, što dastajucca čałavieku z naradžeńnia.
Najbolš raspaŭsiudžanymi chvarobami byli nazvanyja boli ŭ śpinie, depresija i aniemija, karyjes, dyjabiet, mihreń i boli ŭ šyi. Kali ŭ Zachodniaj Jeŭropie najbolš hod žyćcia ŭnosiać išemičnaja chvaroba serca, rak lohkich i insult, to ŭ Afrycy siarod lidaraŭ VIČ/ŚNID, malaryja, dyjareja i infiekcyi nižnich dychalnych šlachoŭ.
Ale, pišuć daśledčyki, hłabalnaja sistema achovy zdaroŭja musić źviartać uvahu nie tolki na śmiarotnyja chvaroby, ź jakimi aktyŭna zmahajucca ŭ apošnija hady, ale i zaŭvažyć tyja, što adbirajuć u čałaviectva najbolš hod žyćcia.
