Džeb Buš, syn i brat dvuch byłych prezidentaŭ ZŠA, nazvaŭ Uładzimira Pucina «biaźlitasnym prahmatykam», jakoha treba spynić.
AP
Pra heta jon zajaviŭ u Bierlinie, dzie pryniaŭ udzieł u ekanamičnym forumie, arhanizavanym CHDS, partyjaj kanclera Anhieły Mierkiel.
Eks-hubiernatar Fłarydy, jak čakajecca, abvieścić na nastupnym tydni pra namier zmahacca za Bieły dom u 2016 hodzie. Buš rezka krytykuje palityku Baraka Abamy, jakaja nie zdoleła praduchilić kryzis va Uschodniaj Jeŭropie, spravakavany aneksijaj Kryma Rasijaj.
Słoŭnyja ataki na Pucina i jaho režym, jak paviedamlajecca, stanuć lejtmatyvam jeŭrapiejskaha turne Džeba Buša, jaki naviedaje taksama Polšču i Estoniju.
Jak i bolšaść respublikancaŭ, Buš padtrymlivaje ideju pastavak zbroi Ukrainie.
Pieradvybarnaja pramova ŭ Bierlinie
Džeb Buš zajaviŭ u Bierlinie, što ŭ vypadku jaho pieramohi na vybarach u 2016 ZŠA prykładuć bolš važkija namahańni, kab spynić «ahresiju Uładzimira Pucina» va Ukrainie i va Uschodniaj Jeŭropie.
«Chto b sumniavaŭsia, što Rasija budzie i dalej rabić usio, što joj uzdumajecca, kali jaje ahresija zastaniecca biez adkazu», — cytuje Buša New York Times.
Jon skazaŭ, što budzie imknucca «izalavać karumpavanaje kiraŭnictva [Pucina] ad naroda». Narod Rasii Buš nazvaŭ «achviaraj biezrazvažnych pavodzin» jaje prezidenta.
Pucin, skazaŭ Buš, — «žorstki prahmatyk, jaki budzie praciskać svajo, pakul chtości nie naciśnie u adkaz».
ZŠA i Jeŭropa, na dumku Buša, pavinny previentyŭna strymlivać «ahresiju, jakoj my aścierahajemsia z boku Rasii», a nie reahavać postfaktum, što tolki zaachvočvaje «błahija pavodziny Pucina». «Rasija pavinna pavažać suvierenitet usich svaich susiedziaŭ», — zajaviŭ eks-hubiernatar.
