Sioleta ŭ Minsku ŭpieršyniu projdzie mižnarodny konkurs-forum «Misis Suśviet».
Jak paviedamiła na pres-kanfierencyi 22 červienia člen arhkamiteta konkursu, pradstaŭnica Biełarusi na «Misis Suśviet — 2014» Natalla Trafimava, z 24 pa 30 žniŭnia biełaruskuju stalicu naviedajuć prykładna 50 udzielnic z roznych krain śvietu. Finalnaje šou adbudziecca 29 žniŭnia ŭ kancertnaj zale Prime Hall.
U arhkamitet pastupiła bolš za dziesiać zajavak ad biełaruskich pretendentak, jakija žadajuć sioleta pradstaŭlajuć krainu na konkursie. «Ja nie budu nazyvać imion žančyn, jakija dasłali svaje zajaŭki, ale heta pradstaŭnicy roznych sacyjalnych śfier, — adznačyła Trafimava. — Siarod pretendentak jość biźnies-łedzi, aktrysa, juryst, vykładčyk BDU, uładalnica tytuła «Misis Biełaruś». Mižnarodnaje žury zrobić svoj vybar, i chutka my nazaviom pradstaŭnicu Biełarusi».
Prava na praviadzieńnie ŭ Biełarusi konkursu «Misis Suśviet — 2015» zavajavała vykładčyk matematyki ŭ adnoj z maskoŭskich himnazij Śviatłana Kuźniacova, jakaja stała adnoj ź pieramožcaŭ konkursu ŭ 2013 hodzie. «Amieryka, pradstaŭnica jakoj Sabryna Pinijon zavajavała tytuł Misis Suśviet — 2014, sioleta admoviłasia ad praviadzieńnia konkursu, tamu prava pierajšło Biełarusi», — rastłumačyła Trafimava.
Jak adznačyła na pres-kanfierencyi pradstaŭnica arhkamiteta konkursu «Misis Suśviet — 2015» Alesia Kakošnikava, «Misis Suśviet» — «heta nie tradycyjny konkurs pryhažości». «Heta chutčej sacyjalny forum, asnoŭnaj temaj jakoha źjaŭlajecca baraćba z nasillem, pošuki vychadu z prablemy, — skazała jana. — Tut kožnaja z udzielnic źjaŭlajecca pasłom dobraj voli svajoj dziaržavy».
U miežach forumu adbuducca dziasiatki mierapryjemstvaŭ. Dzień nacyjanalnaha kaściuma budzie praviedzieny na adnoj z etničnych placovak Biełarusi — ciapier arhanizatary viaduć pieramovy pa hetym pytańni ź Biełaruskim dziaržaŭnym muziejem narodnaj architektury i pobytu i muziejnym kompleksam «Dudutki».
Taksama ŭ miežach konkursu projduć Dzień talentaŭ, Spartyŭny dzień, a taksama Dzień dabračynnaha viasiella, dzie ŭsie ŭdzielnicy zmohuć padaryć 40 biełaruskim dzieciam sa šmatdzietnych siemjaŭ školnyja partfieli, sabranyja doma svaimi rukami.
Dzień forumu «Suprać nasilla ŭ siamji» sioleta budzie adroźnivacca ad usich papiarednich. Upieršyniu ŭ miežach konkursu adbuducca nie tolki vystupleńni ŭdzielnic z dakładami pra baraćbu z nasillem u ich krainach, arhanizatary płanujuć taksama sabrać na adnoj placoŭcy achviar nasilla, jakija ŭ hety dzień zmohuć atrymać kvalifikavanuju biaspłatnuju jurydyčnuju dapamohu.
Arhanizatarami konkursu vystupajuć bałharskaja kampanija Mrs. Universe LTD i TAA «Pradziusarski centr «Misis Suśviet».
