U suviazi z płanami administracyi handlovaha centra «Ekspabieł» likvidavać da 1 žniŭnia budaŭničy i aŭtamabilny rynki, jakija raźmiaščajucca na jaho terytoryi ŭzdoŭž minskaj kalcavoj aŭtadarohi, niekalki dziasiatkaŭ pradprymalnikaŭ budaŭničaha rynku 24 červienia praviali schod z udziełam žurnalistaŭ.
Jak skazali pradprymalniki, napiaredadni pradstaŭniki administracyi «Ekspabieła» zajavili, što rynki buduć likvidavanyja ŭ suviazi z budaŭnictvam aŭtamabilnaj darohi, adnak nijakaha dakumientalnaha paćviardžeńnia ź miascovych orhanaŭ ułady, pavodle ich słoŭ, administracyja handlovaha centra nie dała.
Zamiest likvidavanych rynkaŭ «Ekspabieł» prapanavaŭ pradprymalnikam zaniać novuju handlovuju placoŭku za hipiermarkietam Bigzz, adnak zabaraniŭ im pieranosić na novyja handlovyja miescy staryja boksy i zapatrabavaŭ abstaloŭvać placoŭku nanova. Pradprymalniki padličyli, što kožny ź ich z-za hetaha paniasie straty ŭ pamiery prykładna 20 tysiač dołaraŭ, a jašče pryblizna 15—20 tysiač daviadziecca zapłacić za novaje pamiaškańnie.
Akramia taho, pradstaŭniki «Ekspabieła» paviedamili, što na novaj placoŭcy pradprymalniki zmohuć pracavać na praciahu dvuch hadoŭ, paśla čaho na hetaj terytoryi budzie pabudavany bujny biźnies-centr, adnak arendnyja adnosiny na novym miescy ź imi pa nieviadomaj pryčynie płanujuć zaklučyć tolki na paŭhoda.
Pradprymalniki nie zhodnyja z umovami, jakija vystaŭlaje kiraŭnictva «Ekspabieła», i zajaŭlajuć, što va ŭmovach kryzisu i padzieńnia popytu abstalavańnie novych handlovych płoščaŭ pavinna vieścisia za košt handlovaha centra. Pavodle ich słoŭ, košt arendy na hetym rynku i tak adzin z samych vysokich u stalicy i dasiahaje 25—26 jeŭra za kv. mietr, u toj čas jak inšyja rynki starajucca iści na ŭstupki arandataram, kab zapaŭniać handlovyja rady.
Pry hetym, zajaŭlajuć pradprymalniki, umovy pracy na rynku «Ekspabieła» nie samyja vyhadnyja — administracyja centra patrabuje abstaloŭvać, ramantavać i dobraŭparadkavać arandavanyja miescy za svoj košt. U toj ža čas u pradprymalnikaŭ jość narakańni nakont achovy rynku. Naprykład, niekatory čas tamu niekalki boksaŭ abrabavali. Akramia taho, niahledziačy na najaŭnaść achovy, na terytoryi rynku ŭ niepracoŭny čas źbirajucca haradžanie, jakija vypivajuć i śmieciać kala boksaŭ, a ŭ vyniku za biesparadak na pracoŭnych miescach pradprymalniki atrymlivajuć ad administracyi rynku bujnyja štrafy.
Paśla sustrečy z žurnalistami ŭdzielniki schodu praviali pieramovy z dyrektaram «Ekspabieła» Piatrom Sinkievičam. Jon zajaviŭ, što pradprymalniki, ź jakimi dahavory arendy zaklučanyja da 1 lipienia, zmohuć pradoŭžyć pracu da 15 lipienia na padstavie dadatkovaha arendnaha pahadnieńnia.
Pradprymalniki majuć namier źviarnucca pa dapamohu ŭ vyrašeńni hetaj situacyi da kiraŭnictva Minskaj vobłaści.
