Pieramovy ŭ Bruseli pamiž Hrecyjaj i jaje kredytorami, jakija zaciahnulisia za poŭnač, pierapynienyja biez dasiahnieńnia pahadnieńnia. Pamiž bakami pa-raniejšamu zastajucca roznahałośsi. Jak čakajecca, pieramovy adnoviacca ŭ čaćvier.
Premjer-ministr Hrecyi Aleksis Cypras vioŭ pieramovy ź mižnarodnymi kredytorami, niahledziačy na adroźnieńni ŭ razumieńni šlachoŭ pieraadoleńnia daŭhavoha kryzisu. Surjoznyja roznahałośsi zastajucca ŭ pytańniach piensijnaj reformy, pracoŭnaha zakanadaŭstva, padatkaabkładańnia, zarobkaŭ u hrečaskim dziaržsiektary i inviestycyj.
Ministry finansaŭ krain jeŭrazony abvinavačvajuć hrečaskija ŭłady ŭ niežadańni pajści na kampramis, niahledziačy na nabližeńnie terminu vypłaty pa kredytach. Hrecyja abaviazanaja da kanca červienia vypłacić 1,6 młrd jeŭra, uziatych u kredyt u MVF, ci abviaścić defołt.
Cypras raskrytykavaŭ kredytoraŭ za admovu pryniać jaho prapanovy pa praviadzieńni reformaŭ, jakija, jak jany ličać, nielha realizavać.
Premjer-ministr Hrecyi pravioŭ sieryju pieramovaŭ ź Jeŭrakamisijaj, Jeŭrapiejskim Centrabankam i Mižnarodnym valutnym fondam. Usie baki spadziajucca zaklučyć pahadnieńnie, jakoje dazvolić vydać Hrecyi kančatkovy tranš ekstranaj dapamohi ŭ 7,2 młrd jeŭra.
Ale paśla niekalkich hadzin pieramovaŭ u sieradu praryvu nie było. Paviedamlałasia, što pamiž bakami zachoŭvajucca istotnyja roznahałośsi. U pryvatnaści, pradstaŭnik MVF patrabuje skaracić sacyjalnyja vydatki, u toj čas jak Hrecyja addaje pieravahu pavysić padatki dla zamožnych hramadzian.
Pieramovy praciahnulisia ŭviečary z nadziejaj, što bakam udasca znajści kampramis pierad sustrečaj Jeŭrahrupy ŭ čaćvier z udziełam ministraŭ finansaŭ jeŭrazony.
