Staršynia Biełaruskaja partyi levych «Spraviadlivy śviet» Siarhiej Kalakin 20 lipienia nie zmoh adkryć rachunak dla stvareńnia asabistaha finansavaha fondu pretendenta na prezidenckuju pasadu. Pra heta palityk paviedamiŭ BiełaPAN.
Kalakin skazaŭ, što pryjechaŭ u 514-je adździaleńnie «Biełarusbanka» na vulicy Surhanava ŭ Minsku z usimi nieabchodnymi dakumientami, kab adkryć rachunak. «Heta zajava, vypiska rašeńnia Centrvybarkama ab rehistracyi inicyjatyŭnaj hrupy i pašpart. Mnie skazali, što ničoha adkryć nie mohuć, davaj paśviedčańnie kandydata ŭ prezidenty. Ja pasprabavaŭ rastłumačyć, što jašče da kandydata ŭ prezidenty treba sabrać podpisy. Jany ŭ vyniku skazali, što ničym dapamahčy nie mohuć», — adznačyŭ palityk.
Zatym Kalakin patelefanavaŭ u koł-centr «Biełarusbanka», dzie jamu taksama skazali, što nijakich ukazańniaŭ jany nie atrymlivali nakont hetaha i buduć raźbiracca. «Paśla hetaha patelefanavaŭ u Nacyjanalny bank. Paŭtaryłasia taja ž historyja: skazali, što buduć raźbiracca, što ŭkazańni takija, zdajecca, jość, ale treba, kab «Biełarusbank» raspracavaŭ niejkuju ŭnutranuju instrukcyju, formu dahavora, jaki jany buduć zaklučać pry adkryćci rachunku. Patelefanavaŭ u CVK, jany razvodziać rukami, budziem raźbiracca. Rachunak pakul ja tak i nie adkryŭ», — skazaŭ pretendent na pasadu prezidenta.
«Łukašenka zajaŭlaŭ, što ŭłada zdaje ekzamieny na hetych vybarach, — adznačyŭ Kalakin. — Majo ŭražańnie, što jany ŭžo dapracavalisia naohuł da ručki, kali takija prostyja rečy, jak uzhadnieńnie pamiž dvuma viedamstvami, nie mohuć vyrašyć napiaredadni prezidenckich vybaraŭ, nie viedajuć norm zakonu».
Na dumku Kalakina, «heta havoryć pra poŭny paralič ułady». «Ja nie ździŭlajusia, što jany nie mohuć zabiaśpiečyć ludziej pracaj, vypłacić im narmalnuju zarpłatu. Im treba adzinku za arhanizacyju vybaraŭ stavić. Adzinaja mahčymaść finansavańnia kampanii praz vybarčy fond prosta nie moža być realizavanaja z-za biazdarnaści i nievykanalnaści čynoŭnikaŭ», — padkreśliŭ jon.
Palityk taksama adznačyŭ, što zhodna z zakonam moh adkryć rachunak jašče 17 lipienia, kali Centrvybarkam zarehistravaŭ jaho inicyjatyŭnuju hrupu. «A tak paśla rehistracyi rachunku ja jašče dva ci bolš dzion budu čakać, pakul CVK pravieryć rachunak, i tolki tady apublikujuć źviestki ab jaho adkryćci. Takimi tempami vybarščyki daviedajucca pra mahčymaść padtrymać pretendentaŭ tolki da kanca zboru podpisaŭ», — ličyć Kalakin.
