Hetym razam vyłučency ŭ kandydaty mohuć całkam zakonna płacić siabram svaich inicyjatyŭnych hrup za sabranyja podpisy. Apłata idzie z vybarčaha fondu kandydata, jaki moža być stvorany ad momantu rehistracyi inicyjatyŭnaj hrupy Centrvybarkamam.
Lidar AHP Anatol Labiedźka kateharyčna zajaŭlaje: pryncypovaja pazicyja — nie płacić zborščykam podpisaŭ.
«U nas usio ž taki vałanciorskaja hrupa — my ludziej nie ciahnuli. I my ludziam nie pakazvali rubiel, — razvažliva sprabuje davodzić mnie Anatol Labiedźka. — My viedajem, jak sabrać 100 tysiač podpisaŭ, kali ŭ ciabie jość resurs i ty płaciš ludziam. A voś praca biez hrošaj — heta novy dośvied, i ja nie viedaju, jak jon spracuje».
Nie źbirajucca płacić ludziam za ich pracu i byłyja kamunisty z partyi levych «Spraviadlivy śviet». Bolš za toje, lidar partyi i pretendent ŭ prezidenty Siarhiej Kalakin upeŭnieny: heta ludzi pavinnyja vydatkoŭvać hrošy na jaho vybarčuju kampaniju, a nie jon płacić im za dapamohu.
«Sacyjałohija pakazvaje, što ŭ nas bolš za 5 miljonaŭ čałaviek, jakija chočuć pieramien. I jany sami pavinnyja niešta ŭkłaści ŭ hetuju pracu pa pieramienach. Tamu pryncypovaja pazicyja — nikomu my płacić nie budziem! — navat aburajecca takoj pastanoŭcy pytańnia Siarhiej Kalakin. — Budziem źviartacca da ludziej, kab jany finansavali vybarčuju kampaniju našu».
Nie źbirajucca płacić za sabranyja podpisy i siabram inicyjatyŭnaj hrupy Taćciany Karatkievič. Ale karmić i kampiensavać niejkija vydatki im usio ž buduć, kaža kiraŭnik inicyjatyŭnaj hrupy Taćciany Andrej Dźmitryjeŭ, raźlivajučy žurnalistam navarysty boršč pierad padačaj na rehistracyju ŭ CVK śpisaŭ inicyjatyŭnaj hrupy.
Andrej Dźmitryjeŭ: «Kali ŭ nas budzie mahčymaść kampiensavać čałavieku vydatki na toje, kab nabyć sabie pajeści, bo heta sapraŭdy ciažkaja praca, treba niekudy iści, ci kampiensavać im prajezd pa horadzie albo za horad, to my budziem sprabavać heta rabić».
Taki ž padychod — kampiensavać transpartnyja vydatki i vydatkoŭvać na charčavańnie — u imaviernaha kandydata Viktara Ciareščanki.
Nie, nu što z hetaj «piataj kałony» voźmieš! I ja telefanuju ŭ inicyjatyŭnuju hrupu dziejnaha kiraŭnika krainy Alaksandra Łukašenki. Źbirać za jaho podpisy budzie ažno 10,5 tysiač čałaviek.
«Ja treci raz u składzie inicyjatyŭnaj hrupy i nikoli za heta ni kapiejki nie atrymlivaŭ! — ščyra raspaviadaje namieśnik staršyni hramadskaha abjadnańnia «Biełaja Ruś» Siarhiej Piharaŭ. — Heta naša ŭnutranaje pierakanańnie — my abjadnanyja ŭ arhanizacyju «Biełaja Ruś», heta prychilniki našaha prezidenta. Niejak pra hrošy ŭ nas nie pryniata było. A tym bolš aceńvać svaju pracu ŭ niejkich kupiurach…»
Namieśnik staršyni «Biełaj Rusi» ŭpeŭnivaje, što kali b jamu navat prapanavali hrošy za pracu pa zbory podpisaŭ za Alaksandra Łukašenku, to jon by admoviŭsia: «Bo tady ŭsio pieravodzicca na kamiercyjnyja rejki, i ad našaj pierakananaści, ad našych pryncypaŭ ničoha nie zastajecca». A paabiedać možna i za svaje — kab pryncypy calejšymi byli.
A voś u štabach lidara ŁDPB Siarhieja Hajdukieviča i «kazackaha atamana», lidara «Biełaruskaj patryjatyčnaj partyi» Mikałaja Ułachoviča ščyra pryznajucca — płacić ludziam buduć. Praŭda, nie ŭdakładniajuć, kolki.
«Sistema zaachvočvańnia praduhledžanaja, u lubym vypadku zadarma pracavać ludzi nie buduć. Ale ličby dakładnyja nazaviom krychu paźniej», — abiacaje namieśnik lidara partyi Aleh Hajdukievič.
«U nas ža rynak! — razvodzić rukami Mikałaj Ułachovič. — A tut čałaviek addaje svoj čas hetaj pracy. Voś vy bačyli, jakija ŭ nas ceny ciapier? Čałavieku ž treba za niešta žyć, charčavacca. Praŭda, jakaja budzie apłata, pakul skazać nie mahu — jašče nie zajmalisia hetym pytańniem».
