Ministerstva kultury nakiravała ŭ Minharvykankam niekatoryja rekamiendacyi, jakija haradskim uładam prapanoŭvajecca ŭličyć pry praviadzieńni rabot u rajonie Asmołaŭki, paviedamiŭ na pres-kanfierencyi 13 žniŭnia ŭ Minsku namieśnik ministra kultury Alaksandr Jacko.
Asmołaŭkaj nazyvajuć dva kvartały, što ŭ miežach vulic Maksima Bahdanoviča, Kisialova, Kamunistyčnaj i Kujbyšava.
Heta paślavajenny rajon, byŭ pabudavany ŭ 1940—1950-ja hady. Architektar Asmałoŭski prajektavaŭ hetyja kvartały ŭ jakaści žylla dla vyšejšaha kiraŭnictva štaba Biełaruskaj vajennaj akruhi.
Na dumku staršyni Biełaruskaha dobraachvotnaha tavarystva achovy pomnikaŭ historyi i kultury (BDTAPHiK) Antona Astapoviča, Asmołaŭku možna razhladać jak samy pieršy spalny rajon Minska, jaki byŭ zabudavany pa dastatkova prafiesijnych typovych prajektach, u jakim damy ŭtvarajuć kamierny horadabudaŭničy ansambl.
Pavodle słoŭ Jacko, ministerstva razhledzieła pytańnie pa Asmołaŭcy paśla zvarotu hramadzian i zapytaŭ ź Minharvykankama. Viedamstva, u svaju čarhu, pacikaviłasia mierkavańniem adnosna kaštoŭnaści rajona ŭ Nacyjanalnaj akademii navuk.
«Kaniešnie ž, peŭnuju cikavaść z architekturna-budaŭničaha punktu hledžańnia hety rajon saboj ujaŭlaje, — skazaŭ čynoŭnik. — Inšaje pytańnie — techničny stan hetych damoŭ i pytańnie raźvićcia nazvanaj terytoryi. Ministerstva kultury źviarnułasia ŭ Minharvykankam z prapanovaj usio-taki źviarnuć uvahu na hetyja pieradumovy pry prajektavańni i pryniaćci rašeńnia pa hetym rajonie. Choć farmalna ni jon, nivodnaja ź jaho składajučych častak nie źjaŭlajucca historyka-kulturnaj kaštoŭnaściu».
Prablemu zachavańnia Asmołaŭki jak kompleksnaha pomnika horadabudaŭnictva jašče ŭ 2007 hodzie ŭzdymaŭ hałoŭny ekśpiert respublikanskaj dziaržaŭnaj ekśpiertyzy Ivan Žuraŭloŭ. Z padobnymi prapanovami ŭ 2008—2012 hadach vystupała i BDTAPHiK. U apošnija hady losam staličnaha rajona paturbavalisia i miascovyja žychary. Tak, kala hoda tamu pad zvarotam u Minkultury i harvykankam padpisałasia bolš za tysiaču čałaviek, jakija zaklikali ŭłady pravieści kapitalny ramont rajona, kab jon staŭ histaryčnym centram stalicy.
Tym nie mienš viasnoj hetaha hoda adzin z dvuchpaviarchovych budynkaŭ u Asmołaŭcy byŭ vykupleny pradziusarskim centram «Spamaš», jak śćviardžałasia, dla rekanstrukcyi. Adnak budynak źnieśli, a na jaho miescy centr płanuje ŭźvieści trochpaviarchovy budynak.
