Staršynia Partyi BNF Alaksiej Janukievič padtrymaŭ ideju Ruchu za svabodu, kab udzielnica prezidenckich vybaraŭ Taćciana Karatkievič dała hramadskaści mahčymaść pravieryć sabranyja joju podpisy.
«Ideju Ruchu «Za svabodu» liču słušnaj i całkam padtrymlivaju, — napisaŭ jon u liście, jaki atrymała «Naša Niva». — Sprava z podpisami maje dva aspekty. Pieršy i samy istotny faktar — podpisy u padtrymku Taciany Karatkievič, jakaja adzinaja z demakrataŭ idzie na rehistracyju. Vielmi važna, kab my mahli aperavać katehoryjami faktaŭ, a nie katehorymi «vieru — nia vieru». I faktam moža być jakraz niezaležnaja pravierka podpisaŭ.
Naturalna, jość upartyja bajkotčyki, jość zajzdrośniki, jość pravakatary dy roznyja varjaty. Za ich mierkavańnie zmahacca niama nijakaha sensu, dla ich luby udzielnik vybaraŭ, jaki realna pracuje ź ludźmi, zaŭsiody budzie zdradnikam. Ale sytuacyja ŭ tym, što jość niamała adekvatnych ludziej, lidaraŭ dumak, jakija vykazvajuć sumnievy. Pačynajučy ad Uładzimiera Niaklajeva, byłoha kiraŭnika «Havary praŭdu».
I najlepšy, vydatny, prosty sposab adkazać na sumnievy – addać podpisy na pravierku hramadzkaści.
Što tyčycca BNF — my asnoŭny upor rabili na zbor podpisaŭ za Tacianu Karatkievič u pikietach pad bieł-čyrvona-biełymi ściahami, u 11 haradoch, u Miensku u niekalkich punktach. Pa źviestkach upravy, siabry BNF sabrali za Tacianu Karatkievič 10 300 podpisaŭ, jość kopii, bolšaść ź ich užo ŭ Miensku i my hatovyja litaralna siońnia pieradać ich ruchu «Za svabodu» dy ŭsim zacikaŭlenym na pravierku.
Ale tut važny i druhi aspekt — heta ahučanyja Anatolem Labiedźkam dy Siarhiejem Kalakinym ličby sabranych podpisaŭ. Ja liču, što ščyraj dy sumlennaj ich pazycyju možna budzie nazyvać tolki paśla taho, jak hramadztva hetyja podpisy pravieryć. Inačaj jany nia majuć maralnaha prava aperavać tymi dziasiatkami tysiačaŭ podpisami, jakija nazyvajuć u svaju padtrymku».
