Pobač z Alaksandram Łukašenkam na sustrečach u Piekinie siadzieŭ ministr abarony Andrej Raŭkoŭ (sprava) i kiraŭnik vajskova-pramysłovaha kamiteta Siarhiej Huruloŭ.
Alaksandra Łukašenku ŭ Kitai supravadžajuć ministr abarony Andrej Raŭkoŭ i kiraŭnik Vajskova-pramysłovaha kamiteta Siarhiej Huruloŭ. Jakija supolnyja intaresy mohuć być u Biełarusi i Kitaja ŭ pytańniach uzbrajeńniaŭ i vajskovych technałohij? My spytalisia pra heta ŭ vajskovaha ahladalnika Alaksandra Alesina.
Alaksandr Alesin: Kali brać apošnija padziei, to Kitaj — naš partnioram pa vytvorčaści reaktyŭnych sistem załpavaha ahniu «Pałanez». Miarkujučy pa infarmacyi, što majecca, heta taki hibryd reaktyŭnaj sistemy załpavaha ahniu i apieratyŭna-taktyčnaha kompleksu, bo jaho adlehłaść paražeńnia moža dasiahać da 280 kiłamietraŭ. Pryčym u kanstrukcyi hetaha kompleksa jość padzieł pracy. Biełarusy vyrablajuć šasi, puskavuju ŭstanoŭku, elektronnaje načyńnie, a Kitaj — samu rakietu. U nas niama vytvorčaści rakiet, ćviordaha porachu. Kitaj ža dasiahnuŭ u hetym kirunku vialikich pośpiechaŭ, niekatoryja miarkujuć, što jany iduć napieradzie Rasii.
Łukašenka zaŭsiody maryŭ atrymać zbroju strymlivańnia suprać susiedziaŭ, jakaja b dazvalała patencyjna nanieści im surjoznuju škodu. Ciapier takoj zbrojaj źjaŭlajucca apieratyŭna-taktyčnyja kompleksy. Darečy, znakamity «Iskander» — heta jakraz apieratyŭna-taktyčny kompleks.
Rasija nie vielmi schilnaja pradavać nam takuju zbroju. Mahčyma, praz našu biednaść. Mahčyma, sami jašče nie pieraŭzbroilisia.
Łukašenka staviŭ zadaču nabyć takuju zbroju ad 2009 hoda. Jon naŭprost kazaŭ, što kołavaja baza i sistema naviadzieńnia budzie naša, a rakietu, kali treba, kupim. Na siońnia ŭsio tak i adbyłosia.
Ja tak razumieju, što vyprabavańni «Pałanezaŭ» adbyvalisia ŭ Kitai. U Biełarusi niama palihona, dzie možna było b stralać na takuju adlehłaść. Navat na 100 kiłamietraŭ. Abiacali «Pałanezy» ŭ 2016 hodzie pastavić na ŭzbrajeńnie.
Kali my ich atrymajem, to heta prymusić usich patencyjnych našych «siabroŭ», adsunuć ad miažy na hłybiniu zvyš 200 kiłamietraŭ najbolš važnyja stratehičnyja abjekty.
«NN»: Ci vysoka cenicca Kitaj na rynku vajskovych technałohij i ŭzbrajeńniaŭ?
AA: Pa-roznamu. Kitaj siamimilnymi krokami zdahaniaje pieradavyja krainy Zachadu i Rasiju. Što tyčyć reaktyŭnych sistem załpavaha ahniu, to tut Kitaj zajmaje viadučaje miesca ŭ śviecie z Rasij.
Što tyčycca tankaŭ, to Kitaj taksama blizki da Rasii.
U avijacyi Kitaj jašče adstaje, bo nie maje ruchavikoŭ z salidnym resursam. Jany skapijavali rasijskija Su-27, vykarystali častku napracovak Izraila, častku skapijavali z amierykanskich anałahaŭ.
Što tyčycca elektroniki, to tut, jak pišuć śpiecyjalisty, jany Rasiju abhaniajuć.
«NN»: Dyk moža supracoŭnictva z Kitajem u vajskovaj śfiery nam vyhadniejšaje, čym z Rasijaj?
AA: Nie zusim tak. Naš uzbrojeny park u vialikaj stupieni saviecki, madernizavany ź jaho ci rasijski. Rasija nie choča hublać Biełaruś sa svaich śfieraŭ upłyvu, i mnohija vajskovyja sistemy nam dastajucca ci pa bartery, ci tanna. U ramkach SND dziejničajuć admysłovyja ceny. Plus da ŭsiaho absłuhoŭvać kitajskuju techniku ciažkavata, bo Kitaj daloka. U sukupnaści hetych faktaraŭ prymušaje nas havaryć, što ŭ bolšaści sistemy buduć rasijskimi, ale na niekatorych praryŭnych kirunkach budzie vykarystoŭvać dośvied Kitaja.
«NN»: A jakija novyja nakirunki dziejnaści z Kitajem moža raźvivać Biełaruś?
AA: Mahčyma, braniatechniki. I druhich vidaŭ rakietna-artylerysckich sistem. Astatniaje nie vielmi vyhadna, ciažkaja łahistyka. A rakiety da «Pałanezaŭ» pastaŭlajucca ŭ śpiecyjalnych pakietach, zavodskaj upakoŭcy. Hetak ža i zachoŭvajucca, tut usio praściej.
Tut moža być supracoŭnictva i ŭ inšy bok. My zajmajemsia vyrabam niekatorych vidaŭ spadarožnikavaha abstalavańnia. Naprykład, sistema aptyčnaha dystancyjnaha zandavańnia Ziamli. Naš spadarožnik «BiełKA» dazvalaje vieści aptyčnaje zandavańnie Ziamli, ale hetaja sistema padvojnaha pryznačeńnia, jana dazvalaje sačyć, jak za pasievami, pažarami, pavodkami, hetak i dazvalaje składać ličbavyja karty ziamnoj pavierchni, jakija spatrebiacca pry naviadzieńni vysokadakładnaj zbroi — kryłatych i balistyčnych rakiet. Pavodle niekatorych źviestak, u nas i tut idzie supracoŭnictva z Kitajem.
