Dziaržstandart spyniŭ realizacyju rybnych kansiervaŭ z parazityčnymi čarviakami, paviedamili u pres-słužbie viedamstva.
Homielskaja abłasnaja inśpiekcyja Dziaržstandarta padčas nahladnych mierapryjemstvaŭ, što pravodzilisia ŭ handlovaj sietcy Homiela, vyjaviła nieadpaviednaść rybnych kansiervaŭ «Piečań traski naturalnaja handlovaj marki «Ryboviedov'», jakija tam realizoŭvalisia, patrabavańniam Dast 13272-2009 «Kansiervy ź piečani ryb. Techničnyja ŭmovy». Vyrablena hetaja pradukcyja TAA «Sampa» (Murmansk) na zamovu TAA «Korsa» (Kalininhrad). Imparcioram u Biełarusi źjaŭlajecca PP «Formuła MK» (Minsk).
U vyniku łabaratornych vyprabavańniaŭ adabranych uzoraŭ rybnych kansiervaŭ była ŭstanoŭlenaja najaŭnaść u ich niežyćciazdolnych pałavaśpiełych hielmintaŭ, skručanych u śpirali, i ich ličynkavych stadyj. Vyjaŭlenyja taksama i stužkavy čarviak (Cestoda), pamier jakoha skłaŭ 9 sm. Pry hetym stupień paražeńnia hielmintami skłała 68%.
Akramia hetaha, piečań traski nie prajšła test i pa inšych arhanaleptyčnych pakazčykach: najaŭnaść pabočnaha pachu akiślenaha tłušču, nieraŭnamierny koler kavałkaŭ piečani — ad śvietła-karyčnievaha da ciomna-karyčnievaha ź zielenavatym adcieńniem zamiest ad kremavaha da šaravataha, a taksama nieŭłaścivy koler vydzielenaha tłušču — ad karyčnievaha da ciomna-karyčnievaha zamiest ad sałamianaha da žoŭtaha.
Pa vynikach nahladnych mierapryjemstvaŭ Dziaržstandart vydaŭ TAA «Jeŭrahandal» i pryvatnamu pradpryjemstvu «Formuła MK» pradpisańni ab zabaronie ŭvozu i abaračeńnia na terytoryi krainy hetych rybnych kansiervaŭ i ab admienie na ich dekłaracyi ab adpaviednaści.
Za vypusk i realizacyju nazvanaj pradukcyi vinavatyja subjekty haspadarańnia taksama pryciahnutyja da administracyjnaj adkaznaści.
U adździele dziaržaŭnaha nahladu i kantrolu Dziaržstandarta prainfarmavali, što pa vynikach pravierak charčovaj pradukcyi ŭ 2015 hodzie impartnyja rybnyja kansiervy ŭvajšli ŭ lik najbolš prablemnych hrup. Abłasnymi inśpiekcyjami ŭstanaŭlivalisia nieadnarazovyja nieadpaviednaści hetaj pradukcyi patrabavańniam standartaŭ pa jakasnych charaktarystykach, a taksama pa masie asnoŭnaha praduktu va ŭpakoŭcy. U hetaj suviazi Dziaržstandart rekamienduje imparcioram «zajmać patrabavalnuju pazicyju adnosna pradukcyi, što zakuplajecca, pry zaklučeńni dahavoraŭ i kantraktaŭ praduhledžvać jaje adpaviednaść dziejnym techničnym narmatyŭnym pravavym aktam: na rynak krainy pavinny pastupać tolki biaśpiečnyja i jakasnyja tavary».
